當紅炸子雞摩連迪斯前日喺法甲聯對雷恩場波，不幸傷足踝被抬離場，家陣未知傷勢嚴重程度，有可能趕唔切喺下周三歐冠盃決賽傷愈。有機會爭足協盃嘅馬賽，上星期亦有射手杜奧巴受傷，禮拜三對華倫西亞上陣成疑。唔通連個天都要玩謝呢兩支法軍？
前日摩納哥為保爭霸一線希望，對雷恩派番摩連迪斯上陣，結果慘敗一比四，僅餘嘅爭標希望冇埋不特止，最慘為球隊一度扳平嘅摩連迪斯勇戰受傷。查實摩納哥上個禮拜對馬賽已經畀佢唞吓冇出，估唔到到呢個禮拜始終難逃一劫。望就望呢個係小劫，你話九日後佢踢唔到決賽，到時波圖職球員笑甩大牙都似。講番馬賽都係面臨類似處境，杜奧巴上星期對摩納哥受傷，不過佢情況明朗啲，斷估就算未好番十成都要落場撼華倫啩？
布林美俾凱沙羅頓炒咗後一直都冇嘢撈，𠵱家想轉去蘇格蘭做喜伯年領隊。聽聞布林美有咁嘅決定，係因佢覺得蘇格蘭波同德國波好似，兼且喺蘇格蘭國家隊教波嘅福士可以照住佢。但福士自身難保，加上蘇格蘭啲球隊十隊九隊財政都唔掂，所以我求大俠勸布林美咪諗得咁美好。
簡奴雖然攞咗佢喺阿仙奴嘅第二面英超聯冠軍牌，但𠵱家就前途未卜；而我求大俠更聽聞，阿仙奴九成唔會同佢續約。雖然佢嘅足球事業唔掂，不過就會喺七月三日同前世界小姐冠軍、同係尼日利亞人嘅艾芭妮戴雅高結婚。簡奴家陣情場得意，將會娶到個靚老婆返嚟，算係咁啦！
賓菲加繼年頭發生匈牙利國腳費亞比賽中猝死後，上禮拜二操練完昏迷嘅十八歲青年隊隊長巴亞奧，日前亦證實不治，死因待定。據講巴亞奧係練完波半粒鐘後收到球會電話，話會簽佢做全職球員後冇耐就暈低，天妒英才真可惜。賓菲加連失兩個年輕有為嘅球員，都算流年不利。
托迪近年搞嘅個人笑話集空前成功，國際米蘭有樣學樣，準備整番本笑中有淚嘅球會笑話集，主要攞近年戰績差同埋球員出位言行嚟講笑，銷售收益撥捐慈善機構，點講都係件好事；再講，托迪自嘲當激勵，過去一年大勇大熟，話唔定國米面對現實可能產生激勵效果都唔定。