馮仁昭四圍超：
梁漢文醉酒行善「兄弟，胃痛呀！」

梁漢文曾經喺皇室堡唱K飲醉咗，差啲碌落樓梯，佢一直耿耿於懷，重話以後要飲少啲，點知噚日又案件重演。
梁漢文噚日晨早六點幾同埋黎明等歌手，重有無綫大班藝人去觀塘出席「公益競步行活動」，起初馮仁昭想同梁炳傾偈，佢助手已經想推，點知梁炳推開助手走向馮仁昭，一嚟就大叫：「傾乜呀？兄弟，我胃痛呀。」又不停儍笑話自己食咗藥，然後又不斷重複講：「兄弟，我胃痛呀。」佢雖然狂飲水，但仍然滿身酒氣。

通頂直落
問佢係咪飲咗酒，梁炳就笑住話：「我梗係飲咗酒啦。」至於前一晚去咗邊，佢唔出聲又話胃痛，臨走前重講一句：「阿彌陀佛！」之後連佢本來要參加競步賽都缺席埋，節目監製何小慧話收到梁炳助手電話講佢唔舒服，所以唔玩，知道佢成身酒味後，何小慧就話會問佢攞番醫生紙。
到晏晝五點半，梁炳回復清醒去電視城錄《勁歌金曲》，佢話前一晚錄音時已胃痛，後來去咗女朋友個生日會，玩到朝早直接去競步賽。其實佢玩通頂又貓晒咁都重堅持到場支持，算係咁啦。

趙薇北京大學生至愛
趙薇、周迅同馮小剛前日喺北京出席「第十一屆北京大學生電影節閉幕式暨頒獎典禮」。趙薇冇受之前單軍旗服事件影響，喺當地勇奪「最受大學生歡迎女演員獎」，馮小剛就奪得「最受大學生歡迎導演獎」，而周迅、李少紅同陳坤更加憑電影《戀愛中的寶貝》得到「最佳藝術創新獎」㖭。

陳煒騎師獻吻好尷尬
朱慧珊、陳煒、張文慈同一班亞視演員，噚日齊齊入馬場出席「亞洲電視賽馬日2004」，第八場亞視盃由朱慧珊同陳煒頒獎，冠軍騎師史科菲喺領獎時錫咗陳煒一啖，搞到陳煒好尷尬。當其時看台重有個男人好肉緊大叫「朱慧珊我愛你、我愛你」，事後朱慧珊話覺得好有趣，完全唔驚，亦都唔會尷尬。

上原多香子來港拍特輯
日本女子前組合Speed嘅成員上原多香子，噚日突然喺銅鑼灣出現，原來佢嚟香港拍特輯，佢噚日遇見記者都好愕然，但都好合作咁企定定影相，反而同行嘅日本攝製隊就猛話唔可以影相，搞到發生輕微衝突，不過上原係公眾人物，企得喺街就任影㗎啦！

Sky遭拖數四個月
Sky噚日去到時代廣場出席「BenQ歐美國家盃足球嘉年華」，佢哋五個好唔開心咁同記者講自己俾人呃錢，原來佢哋早前幫一個廣告商做一個慈善騷，對方應承畀番車馬費，點知就俾人一拖就拖咗四個幾月。佢哋話為咗做呢個慈善騷重推咗一個有五位數酬勞嘅活動，所以以後接工作會小心啲。

成龍醉向林鳳嬌懺悔
香港旅遊發展局噚日安排成龍喺星光大道自己嘅手印前留影，而噚日凌晨佢接受台灣記者訪問時，就當住一眾記者面前打電話畀老婆林鳳嬌，電話中嘅林鳳嬌就估到佢係飲咗酒，之後醉醉哋嘅成龍承認小龍女事件令佢更加珍惜嬌妻，重話自己𠵱家浪子回頭，改邪歸正喎。