精叻練馬師愛倫突然提早退休，肯定係馬圈嘅損失，不過愛倫母親（八十四歲）身體有事，愛倫自己亦唔見得體力好好，要佢經常往返新加坡探母，實在辛苦，提早退休係一個聰明選擇。接替佢嘅，係澳洲練馬師賀賢（DavidHall），四十歲，來頭唔小，本身係血統專家，○三年十一月贏咗墨爾本杯。另一位新練馬師蘇保羅（PaulO'Sullivan）係紐西蘭冠軍練馬師，中貿林與馬主N幾年前喺紐西蘭養過一匹靚馬，就係由蘇保羅馬房訓練嘅，如果中貿林、馬主N今年中籤嘅話，好有機會將匹馬交畀蘇保羅訓練。
咁叻、咁好嘅澳紐練馬師都肯放棄如日方中嘅故鄉事業，嚟香港打天下，證明香港賽馬好有吸引力，搵錢潛質優厚，係一個金礦。蔡約翰來港開倉一炮而紅，唔怪得佢啲鄉里爭住嚟。
叻練馬師賺錢好易，分獎金已分到笑。律師江最近偶然碰到一隻新電子遊戲，以賽馬為主題，佢話玩完之後，我哋就會明白晒練馬師嘅訓練部署手法，可以幫助分析賽馬，增加贏錢機會。使唔使呀？夠運就贏到笑嘞，使乜精心研究。好心水清嘅披圖發現上星期三（五月十二日）夜馬有人喺四、五、六、七場以五號、十二號（可能影射五月十二）作為單Q過關，第四場就爆出大冷Q（五、十二），分三千一百元；第五場本來跑出五、六，但十二號抗議六號得直，條Q變成五、十二，分九百四十一；跟住第六場五、十二，就有巨額過關投注，但係輸咗；第七場又輸埋。如果呢位福至心靈嘅馬迷用十蚊過關玩四穿十五嘅話，已經收咗三十萬一千幾，你話幾好運呢。