上周六熱到暈，但小初仍然約埋一班波友去打波，除咗因為波癮難禁外，股市氣氛令人太悶亦係原因之一。
多名經紀波友齊嗟歎，市況唔就難推廣，就算間公司幾靚仔都冇用，想叫芬佬畀面買番多少都唔容易。好似信利國際（732），近期因為業績靚仔，唔少經紀行家都幫手推介，但聽講反應平平。
信利早排公布，截至3月底止首季盈利1.16億港元，比舊年同期勁升3.44倍。信利旗下液晶體顯示器同電子消費產品，增長都好犀利，其中以液晶體顯示器產品增長前景最樂觀。
信利公眾貨源極疏，係一直以來令人唔敢沾手嘅主因，但早排金手指買咗一批貨，問題已經有改善，加上公司業績靚仔，理論上可吸引更多人捧場。
雖然信利前景相當秀麗，但股價只在公布業績後，彈上接近11元水平，而且好快已經回落，上周五跌1.9%，收10.25元。
慕容小初