雅典奧運會將會喺八月隆重揭幕，一眾中國同香港奧運代表已日以繼夜咁練習，希望可以奪取獎牌為國、為港爭光。地鐵公司為咗向呢班體育健將打打氣，特別搞咗個全港首屆「啦啦隊大賽」，畀啲大、中、小學組隊自行參加，務求可以越洋「發功」，精神上支持內地同香港健兒。
為隆重其事，地鐵噚日請咗已經報名參賽嘅香港教師會李興貴中學啦啦隊表演一番。十五個分別讀中一至中四嘅學生出盡渾身解數，非常落力咁跳，為內地同香港健兒打個「早」氣。
地鐵高層同八方講，比賽會喺七月舉行，每組冠軍可以同來自澳洲同美國等地嘅啦啦隊精英，包括2003年度美國NBA啦啦隊比賽冠軍BlazerCheerTeam，一齊喺地鐵商場巡迴表演。
李興貴中學嘅同學又同八方講非常鍾意跳舞，但喺咁多人面前做啦啦隊都係第一次，所以都有啲驚。八方發現喺班學生隔籬嘅女仔就好淡定，原來佢係教呢班學生跳舞嘅導師，名叫李詩敏。呢個後生女原來啱啱中五畢業，返母校做緊教學助理兼教班師妹跳舞，認真唔話得。有興趣參加嘅學生可打電話組隊報名，電話係28566609。
傳真︰2623-9278
電郵︰