呢輪好多朋友問我，點解日本下至藝人江角真紀子，上至東京都知事石原慎太郎，甚至首相小泉純一郎，明知自己係公眾人物，都夠膽靜雞雞唔交佢哋叫「國民年金」嘅強積金。可能係人都有私心啦，我哋香港人供嘅強積金，將來退休可以攞番晒，但日本嘅退休金就係「鋤富扶貧」格局，尤其日本咁多老人，分分鐘一個後生嘅要養三、四個長者，或者江角同小泉都覺得自己係上等人，唔扺啩。
不過，今鋪佢哋俾人爆咗出嚟，事業上多咗笪大污點，先係真正因小失大。小泉就話面皮厚唔辭職啫，江角喺三月尾開咗記招鞠晒躬謝罪，但照樣受盡社會唾罵，要嘔番佢先前拍咗嘅退休金廣告酬勞出嚟，重要辭演拍開嘅其他廣告，以示反省，大家覺唔覺佢呢輪真係影都唔見？
好彩，幾位高官嘅醜事爆咗出嚟之後，被指為罪人嘅江角開始得人同情，因為鬧佢嗰啲人正係自己都冇交嘅高官。最近我羅拉重八到，有電視台打算今個秋天開始畀套日劇佢擔正，角色重係正義嘅警察，加上佢秋天有套電影《釣魚蠢材日記15》上，睇嚟江角同佢老公憂柴憂米嘅日子終於過去。