李克勤及譚詠麟的「左麟右李」演唱會至今開騷近五十場，克勤亦已躋身千萬富翁之列，不過所謂財多身子弱，克勤坦言去年賺錢最多，體質卻最差，聲帶不勝負荷、體重急降，克勤除推工作換取休息時間外，就靠女友盧淑儀為愛郎親手刮痧去骨火。
李克勤前年開始與譚詠麟組成「左麟右李」，一同舉行演唱會，至今在港已開過二十九場，外地則舉行近二十場，加上他入行十八年來有不少銷量不俗的唱片，而「左麟右李」的大碟更成為去年全港唱片銷量冠軍，照計應晉身億萬富翁行列，不過日前他在尖沙嘴接受本報訪問時，即耍手擰頭說：「唔好講錢，講錢傷感情，邊有呀？你講嘅一半一半再一半啦！」
那麼克勤所指即是一千多萬？他說：「唔好計啦，總之唔好講錢啦，我都係舊年至搬新屋，到我個仔大咗都未供完呀，供二十年，開支好大㗎。」
「左麟右李」的成功，令克勤與阿倫名利雙收，不過名利的背後卻付出不少代價，他近年健康狀況欠佳、生活作息不定時、體弱聲差兼體重急降，去年他賺錢最多，但體重竟跌至一百二十多磅。
克勤說：「舊年我係搵錢最多，但整體我嘅身體好唔協調，工作太多，又飛得太多，把聲負荷好大，係我身體最唔好嘅一年，我唔係十八廿二，三十幾歲人啦，食嘢又唔定時，生理時鐘亂晒，成日都好攰，又病，一有發燒感冒就成個月都唔好，我睇中醫刮痧，每隔幾日就要刮一次，後尾Emily（盧淑儀）隔日就同我刮。」
克勤續道：「阿倫就真係犀利啦，我都冇佢咁好體力，嗰陣開演唱會，我攰到即刻仆番屋企瞓覺，到後來我除咗小心飲食，做啲身體嘅預防措施外，就盡量cut通告，錢搵唔晒嘅，畀多啲時間休息。」
克勤入行時已公開表示阿倫是他的偶像，對此他說：「𠵱家可以話佢係我老竇，或者一個似老竇嘅朋友，佢有好多嘢繼續影響緊我。」克勤表示，阿倫不時會忘記歌詞及舞步，如果同一件事發生在其他藝人身上，相信早已被喝倒彩，但阿倫卻免疫，克勤說：「啲人就係鍾意佢唔記得歌詞，佢唔記得，啲觀眾就好開心啦，雖然佢間中俾人笑吓，但大家都係鍾意佢。」
克勤唱了十八年歌，拿了兩屆《勁歌金曲》最佳男歌手獎項，既然他視阿倫為榜樣，那麼將來會否像對方般拒絕領獎但永不言休？克勤說：「封咪我實唔會，我會努力做嘢，有錢搵就搵，唔會唔攞獎。」
八年沒有推出過國語碟的克勤，將於今年年尾再推出國語唱片，他還會接拍至少三部電影，早前他已開工拍攝新片《六壯士》。觸發克勤有新計劃的原因，是本地唱片業衰退所致。
克勤歎道：「係慘㗎，𠵱家唱片業係艱難時間，我睇今年會重差，成個行業嘅銷售額會再跌，要到MP3真係收費，情況至會好啲，出國語碟係我一個大目標，開多個市場就一定啦，都要試吓其他，拍電影亦都會好啲，出唱片一分耕耘，未必有一分收穫，拍電影一分耕耘，可能有兩分收穫。拍戲你會有收入，但片酬唔係主要嘅，如果淨係搵錢，不停喺內地開演唱會都夠，拍戲會有唔同嘅機會同發揮。」
唱片業跌至谷底，除了盜版充斥及MP3之外，不少圈中人也認為歌手也要負責任，因為歌藝欠佳的歌手實在比比皆是，可是克勤說：「時代唔同，唔好一竹篙打一船人，新人需要時間浸，攞啲出道兩、三年嘅歌手同啲唱咗十幾年嘅嚟比，唔係太公道。比起我呢啲老鬼，叫新嘅Eason（陳奕迅）、容祖兒唱得好㗎，何韻詩都有實力，佢都唔係純粹賣包裝賣樣。」
