李克勤和盧淑儀拍拖十二年，兩人之所以能夠維繫這段馬拉松戀情，全憑四大要訣，包括有共同興趣、互相忍讓、給予自由，以及對不順眼的事詐看不見，這樣他們就能和諧共處，十二年來也從未試過戀情告急。
克勤說：「我哋有共同興趣，好似運動啦、睇波、打高爾夫球，平日我收咗工就返屋企，好少出街，除咗TVB騷、開演唱會同拍夜班電影之外，我好少排夜班通告，夜晚十點幾就返屋企。」
克勤續道：「我哋好似正常couple，互相忍讓，忍忍吓就一世㗎啦。對方要刻意改變自己嘅性格就冇可能，亦冇咁嘅必要，我鍾意曼聯，夾硬要我鍾意阿仙奴，咁冇用㗎。同埋盡量畀多啲自由度對方，各自keep番自己嘅生活，睇唔順眼當睇唔到。」
克勤不時與靚女合作，但他卻與緋聞絕緣，克勤靦覥地說：「可能我唔靚，啲人對我興趣不大，我都懷疑自己嘅魅力，一係我後知後覺，一係我直頭唔覺，你有冇介紹呀？睇吓有冇得揀？其實我都係對波有興趣多啲，費事煩，可能係性格問題啦。」
克勤曾表示取得最佳男歌手獎項後便會結婚，但他連續兩年奪得《勁歌》最受歡迎男歌手寶座，至今仍只聞樓梯響。
克勤笑說：「我一定係攞咗男歌手獎之後至結婚啦，但我冇話攞到之後幾耐結呀，我一定會結婚嘅，本來我係諗住今年㗎，但確實冇時間，Eason話結婚，都要等合約滿、停晒工至有時間，但我嘅工作已經排到今年十二月三十一號。」
不過今年是雙春兼閏月的難得好年，明年則為盲年，克勤會不會等到後年才拉埋天窗？他聞言認真思索了一會說：「我又唔想喺明年頭頒獎禮嗰段時間搞，費事俾人話我造勢，聽完你咁講，等我再諗吓先。其實咁多年啦，結唔結婚都一樣，一直都係歌迷同記者最緊張！」Eason女友徐濠縈做了未婚媽媽，不知克勤又會否一樣呢？他即笑說：「唔會啩？我唔會有咁嘅意外嘅，好穩陣㗎。」
採訪：朱倬誼
攝影：林德雄
服裝：D&G
髮型：EddieMa（Headquarters）
場地：馬可孛羅香港酒店