今年嘅E3變成手提遊戲機大戰，遊戲機初哥Nokia自從推出N-GAGE後，見到今年遊戲界老大都將焦點放在手提遊戲機上，自然唔能夠放鬆，第二代N-GAGEQD亦喺E3現身，不論你對N-GAGE評價如何，QD主力會改善電池操作時間、屏幕變得更光及更輕巧，用落更方便。
記者、攝影：許福合
睇落QD外貌，仍然有幾分上代N-GAGE影子，不過體積就變得略為小巧，相當切合佢手機同遊戲機二合一嘅身份，唔使再拎住一部龐然大物傾電話，除此之外，其他設計其實大同小異，尤其按鈕排位亦分別不大。屏幕大小亦冇變動，不過與N-GAGE相比，就明顯覺得夠晒光，即使喺戶外打機，屏幕畫面仍會相當清晰。
舊版N-GAGE其中一個問題，換Game好大陣仗，開蓋取電非常麻煩，身為機迷一分子實在有啲抗拒，還好Nokia都聽到反映，將QD設計成以Hot-Swap換Game，可直接喺機底更換遊戲，記憶卡就仍然係MMC，現有遊戲都可過渡至QD上，對戰方面仍採用藍芽，最多支援8個玩家。其他新增功能包括全新嘅N-GAGEArenaLauncher，方便同其他QD用家聯絡及下載更多資料。
第一代N-GAGE好多玩家都嫌佢唔係咁多Game打，不過隨住新機推出，好多PC及家用機界遊戲，同時嚟個熱血加盟。
今年E3保安嚴密，每次入場都要搜查隨身物品，第一日更搞到門外大排人龍，要花至少45分鐘先可以入場；不過為咗可以第一時間試盡新Game，排吓都要啦！
《SilentHill》系列都唔使小記多作介紹，第4集將會繼續恐怖，隨故事發展會出現唔同場景，由起初嘅地鐵、森林都設計得非常出色，而且今集怪物種類會加到上20種之多，是歷來最多嘅一集。
機種：PS2
𠵱家去機舖，邊隻賽車Game最好玩？當然係《OutRun2》，靚車加靚景，加埋上集嘅名氣，自然吸引。《OutRun2》將會移植至XBOX上，據聞因為兩者使用相同嘅機板，要達到百分百完全移植問題不大，現場所見效果相當接近街機，應可放心，不知各位《OutRun》Fans會唔會因為呢隻Game而買XBOX呢？
機種：XBOX
新一集《ResidentEvil4》將會喺GC上推出，現場所見，呢款名作好似已經變成第一身射擊遊戲，玩家主要操控男角Leon探險。雖然遊戲仍保留傳統解謎元素，不過由於射擊系統實在出色，玩落好似變成動作射擊一樣，算係今集一個特色。
機種：GC
要數今年必玩大作之一，《MetalGearSolid3SnakeEater》必定會入圍，新作經過長時間開發調整後，將會更強調埋身肉搏嘅技巧，例如可以趁住敵人唔留意，偷偷走埋去用槍柄打佢，跟住就可以任你魚肉，玩落同格鬥遊戲又有啲唔同，要求埋戰術同技巧。
機種：PS2
提起CAPCOM，大家都會對《BioHazard》名作特別熟悉，而《DevilMayCry3》嘅名氣就來自當中使用咗由《BioHazard》演變而成嘅角色，及配合至型攻勢動作，夠晒叫座力。試玩過後，印象最深嘅係CG動畫非常出色，一查之下原來由曾監製《MetalGearSolidTwinSnake》動畫嘅北村龍平做幕後製作，難怪效果咁正！
機種：PS2
