資深投資者黎汝遠，重出江湖後積極入貨，早排「唔嫁又嫁」，成功向發展商攞到長成交期後，總共買咗十個貝沙灣南灣單位。
𠵱家個市回落咗，揸住唔少貨喺手嘅黎汝遠話，都要接受現實，佢透露，手頭上嘅貨，已經有一兩件要蝕錢，佢重話，放緊盤嘅，都有機會減價三至五個巴仙出貨。
不過佢話，個市一定係有上有落，所以賺到錢都預咗有機會蝕。
黎汝遠手頭上持有六至七億元貨，貝沙灣佔最多，有成四五億元，當中有啲已經轉手賺咗錢。
蘭西知道，黎汝遠買貨鍾意要求較長成交期，就算個市回落，佢都有大把時間守，應該唔使急於蝕讓。
中原集團主席施永青，對於樓市不時都有好多獨特見解，雖然佢認為，近期樓市見頂回落，但對後市仍然樂觀。
佢回顧過去六年樓市，認為係畀發展商整冧，因為發展商開盤，對手興搞截擊，價錢愈開愈低，有發展商重話要搶居屋客，咁個市點可能好呢？唔知發展商點睇呢？
施老闆話，好彩中央政府政策傾斜，不斷向香港輸送利益，樓市至可以轉勢。
對於中央政府就港人與中央對着幹嘅情況，佢引用毛主席嘅話「打得贏就打，打唔贏就走」來形容，所以中央最後將政治放埋一邊，着力搞好香港經濟。
佢又話，「炒家賺大錢嘅時期過去」，用家應該趁調整時入市，但資金有限嘅炒家，就建議佢哋用有限公司去炒樓喎。
樓市走勢偏軟，銀主出貨都易話為咗，反而有利成交，沙田第一城，有個銀主單位，喺兩個鐘頭內拍板成交。
世紀21區域經理莊振耀話，呢個四十座中層G室，四一零方呎，銀主開價一百一十二萬元，共有五個買家競逐，有見於出價接近心目中要求，終以一百零八萬元賣畀上車客，呎價逾二千六，屬於市價。
莊振耀話，除咗銀主肯收順啲外，單位原業主上個月初至交番畀銀行，室內裝修幾新淨，連冷氣機都有，唔似其他由執達吏上門收番嘅單位，內櫳「爛熔熔」，所以咪可以好快賣得出囉。
新世界香島道33號，係近期南區焦點，恒基地產營業部總經理張炳強都已經睇過，重話睇完之後，有啲啟發。
原來恒基喺南區赫蘭道十一至十二號，都有個地盤，面積四萬方呎，同香島道33號一樣主打獨立屋。
個盤原本諗住起十三幢，三千幾呎獨立屋，不過，張炳強話，睇完人哋個盤之後，發覺間屋大啲重好，所以𠵱家諗住起少幾間，只建九至十間，每間面積增至四千幾方呎，07年落成。𠵱家香島道33號賣二萬幾蚊一呎，張炳強話，計埋通脹，赫蘭道十一至十二號可以賣到三萬蚊呎。
蘭西
電郵地址：