前日，講過智能身份證計劃最近揚威國際，勇奪有「IT界奧斯卡」之稱嘅科技權威雜誌CardTechnologyMagazine首屆「智能卡科技突破大獎」內嘅「推行智能卡科技突破大獎」後，據聞最開心嘅係李生，大家唔好以為係李克勤。當然，大家日日都會睇到佢嘅換智能身份證宣傳短片，講出鏡率贏好多人九條街，但其實有另外一個李生重開心，便係「小小超」李澤楷。
點解關佢事？話說○二年智能身份證項目招標時，小小超已親自到政府做推介（present），結果電盈奪得呢個項目，作為政府嘅合作夥伴，負責搞一百二十萬張智能身份證。小小超當時開心到即刻宴請負責呢個項目仝人到灣仔食意大利菜。
據電盈老友同八方講，小小超將智能身份證項目視為自己嘅baby，依家「仔仔」咁威，佢當然開心，咁會點慶祝呢？首先，多份報章今日有全版廣告，由電訊盈科出錢，恭賀入境處得此殊榮，並承諾以更優質服務，作出回報。跟住，老友話小小超應該係會同班同事食餐勁。
（圖）李澤楷對智能卡極看重，今次得獎自然相當高興。
傳真︰2623-9278
電郵︰