今晚利物浦對紐卡素，爭英超聯第四名，假如紐卡索喺星期三贏唔到修咸頓嘅話，咁就冇得爭啦，否則紐卡素仍有機會。不過最近利物浦氣勢甚佳，紐卡素兵力唔夠，傷兵纍纍，打歐協盃打到殘咗，今晚利物浦勝算甚高，就算打和攞一分都掂。
如果利物浦因為輸咗而失去歐冠盃參賽資格嘅話（呢個機會比較細），有冇人會笑呢？如果有嘅話，相信會係嘉士伯。嘉士伯啤酒贊助利物浦球衣多年，合約明年到期，續約本來應該冇問題嘅，點知殺出一個程咬金，泰國總理組成財團要收購利物浦，其中一位成員係大啤酒商Charoen，佢間公司ChangBeverages本來係嘉士伯嘅泰國啪拿，大家合作生產啤酒，但嘉士伯指Chang不符合合作條件，終止咗合作協議，Chang就告上法庭，要求嘉士伯賠償二十億美元（等於二十倍收購利物浦三成股權嘅價格）。泰國法庭判案，雖然唔算唔公道，但鑑於金融風暴後嘅經驗，外資銀行上法庭向泰國公司追數，總係好多阻滯，大家都會明白、明白。
泰國人收購咗利物浦三成股權咯喎，你估利物浦董事會重制唔制與嘉士伯合作？難啲咯，利物浦如果踢唔到歐冠盃，明年收益起碼少咗二千萬美元，對新股東完全冇好處，反之嘉士伯就會透心涼。呂大樂教授喺中文大學開科講授世界足球，佢本人原是利物浦fans，教書嗰陣，記得講埋「足球、政治、商業競爭、商人治國」嘅錯綜複雜關係呀！