潮流界水貨大亨袁仁祥喺「新發」宴請傳媒朋友午膳，介紹新一季原宿街頭服設計特色，雖然每人只獲一個$30快餐招待，但袁仁祥現場大爆猛料，總算值回票價。佢話：「早排喺中環同人公開動武嘅HipHop界中環之虎，有兩個頭馬，叫『高佬潘』同『紅鞋比利』，佢兩個經常四處招搖，連同門兄弟都對佢哋有微言。不過佢大佬仍好撐佢兩個，開檔上樓舖賣『完全正晒』、『惡魔鎖』同『左輪』等行貨，諗住畀佢兩個落吓腳生活安定啲，點知佢兩個以為呢次真係彈起咗，變得更目中無人；聽聞星期六喺IFC搞場大龍鳳，宴請潮界中人，重話想請埋各潮界坐館到場睇好戲，睇嚟到時潮界將會掀起一場風暴。」
講到呢度袁仁祥不禁發出兩聲冷笑：「好多人問我怕唔怕生意會因此受影響？其實出嚟行咁耐，有咩風浪未見過？中環之虎未彈起前咪又係我啲客，全靠我留啲日本版關刀同猿人牌畀佢。坦白講，有料嗰班潮流搞手，𠵱家已經唔再搞舖，轉為專心開拓更有影響力嘅事業，例如出版、音樂或其他大Project。」袁仁祥呼出水貨煙圈，就像江潮片裏的老叔父：「啲魚毛蝦仔喺屯門撈檔賣碟就以為係大佬，好應該出去公海游一轉開開眼界！」
主持人：大食Jack
八卦熱報：