早陣子，我哋曾經報道過本田代理搞咗個全新Odyssey的Pre-Launch預展，準買家即場落訂購買Odyssey頂級Supreme版，重有一萬蚊折扣優惠，車價不過$309,880，單日就售出半百部！不過，日前筆者收到消息，傳聞話首批抵港的Odyssey新車，檢收中竟發現裝備內的無匙開啟系統以及左右獨立恒溫冷氣組合貨不對辦；前者欠奉而後者卻非原先獨立式設計，高層中有人提議減車價以安撫一班準買家，惟因當天Pre-Launch經已有成萬蚊優惠關係，最終一班高層只有決定退訂。
若然你係班準買家其中之一都唔使咁失望，皆因近日東瀛本土傳來消息，較Odyssey大型兼且豪華，重媲美同級豐田Alphard及日產Elgrand的全新本田UXWagon（暫名），將於下周正式面世。雖然未知本港代理有否考慮引入，惟本地多間汽車平衡進口商卻蓄勢待發，當中頂級3.0i-VTEC型號重有望月底前到港，而售價亦不過40萬上落，有興趣的車迷不妨多等一會！
記者：陳偉林