美元兌日圓繼續升，美元兌日圓Call輪9277與9852有進帳。賭美元兌澳元升跌，亦有相關滙價窩輪可以落注。
認為澳元兌美元會反彈嘅，買澳元兌美元Call輪，對象有9280與9621。前晚，澳元喺歐美市場繼續散，所以兩隻輪昨日亦跌。9280今年7月到期，輪價12.4仙，溢價2.7%，槓桿率43.2倍。9621喺8月到期，輪價2.8仙，溢價10.4%，槓桿率191.3倍。要賭，就賭9280，9621溢價太高，唔實際。
睇美元會繼續升，即係睇淡澳洲紙，則買澳元兌美元Put輪，市場亦有兩隻可以揀，即9625同9281，兩隻輪昨日都因為美元升而升。9625喺8月到期，輪價55仙，溢價1.8%，槓桿率9.7倍。9281今年9月到期，輪價0.207元，溢價4.8%，槓桿率26倍。兩者比較，9625實際啲。賭兩隻輪（睇好美金、睇淡澳洲紙），要留意澳元由2月中見頂至今，已經散咗14%，重有冇再跌空間？美元可能加息嘅殺傷力真係咁大？
個市又再唔掂，啱啱講完期指高水唔一定代表大市向好，期指昨日跌幅又大過恒指。恒指收報11276，計埋滙恒月底前除息因素，實係11230，距離萬一點只相差230點。個市人心虛怯，炒Call輪風險大，要買貨嘅話，都係等大市下試萬一關之時再諗。
章盛