呢邊廂SONYPSP以4.3"巨芒姿態踩入GameBoy地盤，嗰邊任天堂就有NDS力抗外敵。呢部被譽為創意爆燈嘅手提遊戲機，以突破性嘅雙彩芒設計登場，其中一個重係觸控式屏幕㖭，遊戲玩法變化即時提升，往後肯定出現大量古怪意念嘅Game，加埋內置雙處理器，向下兼容舊有GBA卡帶，對機迷嚟講絕對係好事成雙！
美國直擊記者：許福合
呢部NDS（NintendoDaulScreen）於E3正式亮相，自然吸引到唔少參觀者一睹其風采，搞到展館外大排長龍，小記就足足花咗45分鐘先入到NDS展區，任天堂方面可能覺得NDS對大眾比較陌生，首先就請來瑪利奧講解NDS新功能，不過試玩時間少得可憐，只有10分鐘左右。
講番NDS，同GBASP一樣，都係使用摺叠式設計，最特別係一打開見兩個3"嘅屏幕，配合唔同遊戲有唔同用法，例如賽車時，上面可顯示路面情況，而下面則可以顯示賽道上對手資料，好方便。
全E3最矚目嘅其中兩款手提機PSP及NDS已分別亮相，可謂各有長處同賣點，今日就搵嚟玩齊呢兩部新機嘅人士，講吓試玩後嘅感受。
留意NDS底下嘅芒並唔簡單，具備TouchScreen功能，最基本用途可透過內置嘅無線網絡，與附近NDS玩家作文字對話，最多可作16人連線。不過若只得對話用途就比較浪費，任天堂就示範咗一個變種《食鬼》遊戲，玩家可用Stylish畫出一隻食鬼去食嘢，雖然屬示範性質，但就夠晒創意！
另外NDS還用上雙插槽，分別可使用NDS或GBA盒帶，現有GBA遊戲及相關配件都唔使浪費，GBA用家聽到呢個消息就最開心。
處理器：ARM7＋ARM9雙CPU（兼容GBA遊戲）
屏幕：3"TFT×2，下方為觸控式
媒體：1GB容量卡帶
連線：兼容WiFi（最高16人連線）
電池：專用鋰電池
雖然NDS版嘅《Mario64×4》、《銀河戰士》等正Game，喺E3入面並不設試玩，只得一堆官方相及影片介紹，不過前一日嘅任天堂發布會入面，反而有Demo版睇。從《Mario64×4》等幾款動作Game嘅實物版睇到，並冇浪費NDS嘅雙芒設計，就如上方係瑪利奧周圍冒險嘅畫面，下面則會顯示地圖、角色及寶物位置等。比以前下下要停喺度㩒掣先睇到地圖，呢個設計實在方便，抵讚！
今年任天堂明顯以NDS為重頭戲，加上《Mario128》、《薩爾達傳說》新作都冇蒲頭，搞到守住家用機市場嘅GC冇乜聲氣。幸好展館內仍有唔少正Game，對餓咗好耐嘅GC玩家都算係種補償。
前作以創意贏盡機迷掌聲，新一集以電影為背景，最特別係因應唔同情況，玩家可以作出角色替換，包括新角色《DevilMayCry》嘅主角Dante，都會以CrossOver形式登場。技能方面，除咗原有嘅慢動作、變速等，今集還增加重播及多種絕技。值得一提係今集再唔係GC獨佔，同期重會推出PS2版。
由瑪利奧、路易奇與碧琪公主擔正嘅角色扮演遊戲，遊戲最特別係所有角色都以紙片構成，與立體場景合成如同立體童話書一樣嘅畫面，視覺效果相當特別。
《DonkeyKonga》係一款新設計嘅打鼓遊戲，主要考驗玩家節奏感，不過玩法就較PS2嘅《太鼓之達人》多變化，現場一大班人一齊玩，好熱鬧開心。
雖然NDS一推出聲勢強勁，不過唔代表GBA就立即變作過氣產品，配件陸續有來，好似上年E3推出過嘅卡通播放配件，今年就由SmartMedia轉為卡帶式媒體，內裏有多套卡通影片，可以用GBA慢慢睇，內容更超過45分鐘。
