英國萬人迷碧咸（DavidBeckham）早排因為婚外情事件而聲名狼藉，不過呢件事似乎對佢喺美國嘅發展冇乜影響，皆因美國頂級時尚雜誌《VanityFair》搵咗碧咸哥做七月號嘅封面人物，重喺幾星期前喺馬德里影咗輯據聞相當性感嘅相。
事實上以往做親呢本雜誌封面嘅都係超級巨星，包括湯告魯斯（TomCruise）同畢彼特（BradPitt）等，而且極少英國藝人可以做到封面人物，近期就只有祖迪羅（JudeLaw）同嘉芙蓮薛達鍾絲（CatherineZeta-Jones），所以身為英國人嘅碧咸今次的確相當威。
據聞自從電影《我愛碧咸》喺美國上映後，碧咸就開始人氣急升，佢幫眼鏡品牌Police拍嘅廣告喺當地亦隨處可見。有知情人士透露：「當你上到《VanityFair》封面，就知道你已經攻陷咗美國，碧咸應該覺得榮幸。影呢輯相就係想展示佢係真正嘅偶像。」
而搞到碧咸雞毛鴨血嘅盧絲（RebeccaLoos），前日首次喺荷蘭電視台SBS6個娛樂節目《Shownews》亮相，為期兩星期，睇佢同男主持有講有笑，似乎做主持難唔到佢噃。另外，SpiceGirls有意重組，但Victoria個舊隊友MelC死都唔制，所以最近就盛傳BlackEyedPeas嘅Fergie同DanniiMinogue都有機會頂替佢個位。