藍潔瑛同林建明噚日喺將軍澳電視廣播城綵排籌款節目《心晴行動抗抑鬱》，好耐冇見嘅藍潔瑛精神唔錯，但面對鏡頭都有啲唔慣，訪問期間佢好多怨氣咁話係傳媒搞到佢咁，重話自己精神狀況好差。
問藍潔瑛重有冇睇醫生同食藥，佢話：「好耐都冇食，我開始病都係因為睇醫生先出事。」不過，身邊嘅大姐明就即刻叫佢唔好講啲咁嘅嘢。
今次藍潔瑛重會上台唱歌籌款。佢噚日綵排完，大姐明話監製都有讚佢，點知藍潔瑛好勞氣咁話：「佢哋只係對我冇要求啫，之前睇過我啲報道，重驚我會上台度『標童』，都係多得你哋『支持』我，將我印象分壓到最低。」
事後，沙姐話藍潔瑛都只係講笑，呢啲係黑色幽默，重話佢已經好番好多。其實計我馮仁昭話，藍潔瑛經歷咗咁多事，佢有啲咁嘅反應都係好正常啫，不過藍潔瑛咁多怨氣，唔知到表演時會唔會乘機爆肚宣洩吓啲冤屈呢！
黃任中生前契女小潘潘因子宮頸生瘜肉入院做手術，噚日出院，醫生話佢係因為月經長期唔正常，加埋內分泌失調所致。小潘潘最擔心做完手術陰道鬆弛，問佢會唔會考慮做陰道重建手術，佢耍手擰頭，話有一個朋友就係做咗呢種手術，結果陰道太緊連進入都有困難。
李彩樺（阿Rain）噚日喺新城接受訪問，講到最近佢緋聞纏身，佢個前度緋聞男友林峯就表示自己「甩難」，阿Rain聽到之後即刻話：「吓！唔係當我係一個災難呀，佢一向都當我係妹之嘛，不過佢大把妹妹啦，可能重有姐姐都唔定。」
最近有傳台灣名模林志玲嘅被包價係三百五十萬台幣（約八十萬港幣），打敗咗蕭薔成為台灣最高價嘅女藝人，林志玲對呢
許冠傑（Sam）噚日去咗數碼港拍新歌MV，大班記者聞風而至。佢個細仔許懷谷首先喺數碼港嘅數碼媒體中心出現，被問到係咪同爸爸一齊拍嘢，佢笑而不語，過咗一陣，現場保安明顯加強，原來阿Sam坐住佢架三菱四驅車到場，佢戴住頂cap帽同太陽眼鏡不特止，重用埋頭巾包住塊面，兼用手再遮面，點解要咁神秘？
喺有線做《怪談》嘉賓主持嘅林以諾牧師，噚日喺馬來西亞搞棟篤笑，佢喺當地批評香港嘅藝人同記者，話好似謝霆鋒咁又掟結他又頂包，都有後生仔仰慕，又話蘇永康喺台灣勒戒，反映咗時下青年追求刺激而食軟性毒品，至於香港嘅傳媒，就經常報道一啲假新聞，甚至內地嘅傳媒都出現呢種歪風。
麥浚龍（Juno）噚日去商台做直播節目時，有個聽眾打電話同佢講本來以前好憎佢，不過自從聽過佢隻新碟之後就對佢改觀。Juno事後就話聽到之後好開心，因為佢認為起碼目前為止有一部份人已經對佢改觀，而且佢覺得自己同傳媒同埋觀眾嘅關係亦溫和咗㖭。
