分隔西貢同沙田嘅最高山係馬鞍山，不過要俯瞰兩地全景，未必要上到馬鞍山山頂，由水浪窩循麥理浩徑第四段登馬鞍山山脊，一樣有咁嘅景觀，沿途重有大金鐘、大小竹林隧道等靚景點，想影靚相，記住帶備多啲彈藥喇。
記者：陳震霖 攝影：林柏鈞
模特兒：Winnie（StarAsia）、Yoee
起步點水浪窩，先行西貢公路旁嘅企嶺下樹木研習徑，除留意教你認識樹木傳意牌外，千祈咪錯過觀星台。觀星台其實係個由麻石砌成嘅6米高梯形石塔，兩邊有石級行上塔頂，驟眼睇幾似萬里長城烽火台，Winnie話：「咁古代Feel嘅？」梗係喇，因為石塔仿照中國河南登封縣告成鎮嘅古代觀星台建成，登封縣觀星台建於元初，高9米，連中國著名天文學家郭守敬都係靠佢觀測日影，原理係讓陽光穿過台頂窗口，照射地下以觀察日影。
麥理浩徑第四段全程12.7公里，初段係麻石小路，之後接馬路繼續上山，沿途經過一個露營地點，燒烤爐、供水設施齊備，兼有15個營位，大到可以一次過容納50人同時露營，咁風涼水冷，搵日同班Friend上嚟過番晚至得！再行10分鐘，右面出現一個直升機停機坪，附近群山包圍，攤喺停機坪影張靚相就至正。
繼續上山，行得愈高，個景愈開揚，西貢市中心、白沙灣、西貢大小島嶼全部變成小積木，眼力好，最遠嘅馬鞍山都盡入眼簾。
行完馬路，跟路標指示轉入左面竹林小徑，享受完大樹遮蔭微風拂臉嘅暢快感後，緊接山路愈來愈斜，正式挑戰全日最艱辛嘅路段，上登馬鞍山山坳。點艱苦法？山徑多為沙石路，時而石階，時而斜坡，勁考你腳骨力，崎嶇不平唔在講，最慘係沿途無遮無掩，烈日毫不留情將身體水份蒸乾，所以出發前記得帶夠糧水，加多頂太陽帽就無衰嘞。
排除萬難，終於上到馬鞍山南面山坳九曲山，登時視野無垠，一望開闊，企喺山脊，左手面見到西貢海、企嶺下海、西貢市中心，右手面見到城門河道、沙田馬場、馬鞍山市中心，俯瞰如斯廣闊美景，嗰種豁然開朗感覺完全蓋過先前艱辛。
繞過大金鐘，就可以向380米高嘅昂平高原進發。喺香港，海拔數百米高嘅大平地已算本地高原，馬鞍山昂平同大嶼山昂平除咗地名相同，原來連地形同石質都好近似，原先同屬火山岩盆地，灌滿被雨水沖落嚟嘅火山灰同岩石碎，最後再經陸地抬升，形成今天嘅高原平地。好彩嘅話，喺昂平會見到牛牛食草大休㖭。
睇完牛牛，行程已近尾聲，到達茅坪露營地點，再穿過一個大型竹林隧道，左轉落北港，花1小時就可以走出西貢公路，輕鬆搭車返西貢市中心歎下午茶。
欣賞完超闊靚景，繼續南行，無幾耐又見到座大山巍峨眼前，Winnie手指指話：「座山咁得意嘅，成座金鐘咁嘅？」Yoee解釋：「哈，咁都俾你噏中，山名真係叫大金鐘，英文叫『PyramidHill』，雖然無馬鞍山咁高，不過就好得意，任你喺邊個角度睇，個山都係一個對稱三角形，勁似金字塔，所以咪又叫金字塔山囉。」上大金鐘必須離開麥理浩徑，加上山有成60度傾斜，兼無明顯山路，上山就要量力而為嘞。
西貢市中心高勝樓地下一條窄窄小巷，有齊各地美食，本地車仔麵、韓菜同泰菜任你揀，其中嘅滿泰小食店，不嬲都好受市民歡迎，時不時要等位。剛剛行完麥理浩徑，睇怕早餐已消化得所餘無幾，口痕可以整碗泰式滷水雞翼金邊粉（$19）過過口癮，勁肚餓就叫碟魚餅飯（$26），大大碟份量十足，食到飽先出市區。
滿泰小食店（27912271）
地址：西貢福民路高勝樓地下25號舖
去程：西貢市中心乘299號巴士（$9），水浪窩站下車，入麥理浩徑第四段出發。
回程：西貢市中心乘92號巴士（$5.5），返回鑽石山地鐵站。
