啱啱釋完法，中方即時搞作，準備影響九月立法會選舉。《風波裡的茶杯》李鵬飛踢爆，好多喺廣東省做緊廠嘅，或者本地中資機構員工，收到中方嗰頭有勢力人士柯打，叫佢哋九月選舉，要拉足若干張選票，一定要投民建聯或親中候選人。
飛哥、林旭華同梁文道等茶杯「鋤奸三俠」，即時傳召選舉事務處高官對質。選舉事務處高官話，操縱或影響選舉投票結果，屬刑事罪行，最高可罰款五十萬，入獄七年，又呼籲選民踴躍舉報親中勢力嘅小動作，同時叫選民唔使驚，因為入到投票站，投邊個票，冇人會知，即是冇人可以控制到一個人嘅自由意志。
飛哥哋問得好：若然中方利用高科技，到時下令特區各土共社團單位嚴密監視中資員工嘅選民，叫佢哋帶部儍瓜機或視像手提電話，入到去投票站之後，填表填正親中候選人嗰格，然後自拍數碼相為證，出面就有人直線監視，或者事後要佢哋提交相片為憑，否則就炒魷、減薪、降職，咁特區政府點樣保障市民人權，令中資員工不受政治恐嚇？
選舉事務處高官話：咁就易啦，若然要交差，喺投票站帳幕之內，詐詐諦填咗個親中候選人嗰一格，再自拍照片，然後再將嗰個「剔」塗黑咗佢，喺民主派候選人嗰一格畫一個更加大嘅「剔」，咁點票人員就會收到，唔當廢票，會計民主派一票。
飛哥等茶杯「鋤奸三俠」又追問：點解唔可以下令不准攜帶相機、手機等入票站，好似機場過境「實Q」檢驗咁？高官就咿咿哦哦答唔出，話咁做驚住擾民。
其實好多親中老左私下都呻緊老襯，認為基本法冇規定，投票一定要不記名，人大常委應該可以再加一條「解釋」，話由今年九月開始，所有投票選舉，都要提交身份證，每個票站，由解放軍駐守，理由係協助維持秩序，防止外國勢力乘機策劃暴動，並由解放軍監視每個選民，強制性在選票上填埋身份證號碼，然後協助選舉事務處整理選票，同時將所有選票複印一套，送交北京人大常委會存放，以備將來參考，咁就唔怕全港三百幾萬選民會投晒民主派，到時民建聯及親中黨派自己友實贏晒啫！
選舉改為記名，冇違反到基本法喎，乜基本法有規定老馮不記名咩？國家關心市民投票過程，亦好應該，因為政制問題，中央一定要管到底吖嘛！
不過，又試叫過喬曉陽落嚟補解呢一條，今年未必夠時間。如想抗拒赤色恐怖，避免土共在票箱帳幕外遙控中資選民，選舉事務處係咪應該下令所有選民入票箱要脫光衣衫，剝光豬入去填選票，咁就光明磊落兼十足透明度嘞！
傳真︰2623-9278
電郵︰