哈爾濱啤酒（249）股權爭奪戰搞咗成個星期，自從南非股東SABMiller提出以每股4.30元作全面收購後，全世界都在期待美國大股東AB會提出另一個全購建議，連作為旁觀者的小初亦好心急。
經紀黃引述投資銀行界人士所言，話情況唔係證券界睇得咁刺激，當中暗藏唔少變數，投資者想AB提出反收購建議唔係咁容易，所以佢維持上周嘅建議，就係唔好立亂撲落去，重話收到風好多芬佬一直趁高沽貨，散戶慎防接火棒。
哈啤股價噚日再升1.58%，收4.825元，成交繼續熱鬧，成交金額高達6387萬元。
另外，經紀陳日前品題過嘅先科國際（724），噚日配股上板後，股價逆市上升，最高見過1.30元，收1.25元，升5%。可能先科配股金額唔多，加上接貨者又係大隻佬，所以唔多見有沽壓。
不過，就算先科股價愈挾愈高都好，小初都唔會覺得驚訝，正如經紀陳所講，人哋搞緊私人派對，都係坐埋一二角，睇人哋表演好過。
慕容小初