吳君如早排去咗法國，同有線娛樂新聞台主播陸浩明一齊主持節目《巴黎七十二小時》，奉旨歎世界食好嘢，早餐都食成八百蚊嘅海鮮拼盤，有生蠔又有大蝦，佢哋又品嘗法國名菜血鴨，真係恨死馮仁昭！君如之後又去名店ChristianDior試咗兩套新款晚裝，雖然最後冇買到，但佢話試吓已經好滿足。
其實君如一直好想陪阿爸夏春秋（冬叔）同阿媽去歐洲旅行，今次公幹，佢另外買咗兩張機票帶埋父母去玩，當係母親節同父親節嘅禮物。而喺法國之行，冬叔就全程不停講笑話畀君如同埋佢嘅助手聽，笑到佢哋合唔埋口！而君如就買咗好多禮物畀冬叔冬嬸，冬嬸重收到一個係女人都鍾意嘅LV手袋㖭。
台灣《壹週刊》報道話五月天嘅主音阿信，屋企人原來係黑道中人。事緣日前佢參加嫲嫲嘅喪禮，有好多台灣黑幫出現。報道重話阿信嘅爸爸以前開過色情場所，𠵱家就轉行開卡拉OK。喺內地宣傳嘅阿信就寫咗封信，為對家人同隊員造成困擾而致歉，但佢冇否認爸爸嘅黑道背景。
舒淇日前去咗韓國漢城宣傳電影《見鬼2》，佢之前嗰部《夕陽天使》喺當地上映過，所以唔少傳媒同fans認得佢。被問到想同邊個韓星合作？舒淇原來都有兩個人選，就係人氣男星元斌同鄭宇成，佢同時話好有興趣拍吓韓國電影。至於之前話舒淇被邀拍《星戰前傳3》，但舒淇話佢都想，不過單嘢係假嘅！
李克勤噚日去新城接受訪問，佢話遲吓要去北京開演唱會，所以撞期去唔到睇歐洲國家盃。克勤話：「其實我一早買咗四張飛，諗住同女友睇，點知演唱會唔改得期，但我唔去，我女友一個人去又有乜意義呢？所以搞手都畀番八萬幾蚊我當係退飛。」克勤出名係球癡，今次佢去唔到睇波，馮仁昭都覺得可惜！
李彩樺前緋聞男友林峯噚日喺尖沙嘴出席記者會，提到最近同蕭定一傳緋聞嘅李彩樺時，佢話：「我都收到風，如果係就恭喜佢兩個。」問佢有冇酸溜溜嘅感覺？佢話：「唔係吖？細妹都呷醋，況且我哋成兩年冇聯絡。」佢話李彩樺係細妹，但竟然兩年冇搵過人，馮仁昭覺得佢好似冇乜心肝喎！
古巨基噚日去咗土瓜灣綵排「拉闊音樂會」。日前有報道話基仔嘅老友周慧敏唔生BB，基仔聽到即刻話：「係咩？咁我生囉，生埋佢嗰份。不過你問我都答唔到啲乜，能答到嘅只有倪震。如果我生仔就生兩至四個，一個仔其他幾個係女都得。」咁基仔都幾傳統噃！
