泰國總理Thaksim（他信）與利物浦足球會CEO（行政總裁RickyParry）喺曼谷見面，提出收購利物浦三成股權，作價四十億銖（約一億美元），他信對記者話：「呢個價錢唔算太貴。」
身為國家總理，竟然重要牽涉入商業活動，令人搖頭，唔通商人治國就係咁款？好多香港富豪話如果實行特首普選，分分鐘選出李卓人或者長毛雄，唐媽媽又話驚住選出Twins，真係見得嘢少，唔該睇吓泰國，大富豪他信組織一個「泰愛泰」（ThakRakThai）黨，Rak即係Love咁解，參加普選，拉票時飲靚紅酒解渴，咁就擊敗咗泰國民主黨，登上總理寶座，你話幾易呢，香港啲大粒佬應該快啲去曼谷沖吓涼、按吓摩，兼向他信請教競選之道。
不過他信嘅管治作風，學唔過噃。佢召集老友組成財團，包括泰國大啤酒商CharoenSirivadhanabhakdi，兼且搵埋泰國政府落叠，巴閉喇啩？假如我哋董特首（利物浦球迷）集資收購利物浦，叫埋特區政府出錢，你估香港人會有乜反應？他信治理泰國南部無方，搞到立立亂，有恐怖襲擊，政府有餘錢梗係要用嚟救濟南部啦，點解要送畀英國財主使？他信用一啲漂亮口號，話甚麼提升泰國足球水平，令泰國參加世界盃，又話利物浦呢個品牌好值錢，可以幫助泰國推銷產品，曼谷嘅知識分子就唔會信嘞，鄉下農民或者就以為他信好愛國，為國爭光㖭！