五年前開始當上背囊友的吳倩蓮，這數年間走遍世界各地，旅遊期間更愛上了攝影，每到一處都將所見所聞拍下來以便細意回味。不過小倩卻表示，作為一個單身女子到各處遊歷，最要避開的竟然是唾手可得的異地情緣！
吳倩蓮去年秋天獨自一人去北非流浪了一個月，在當地拍的照片，貼滿了房間的當眼處，她日前說：「每次去旅行都影好多相，將自己最近去過嘅地方作品放當眼處，去到我間房就知我最近去過邊。」小倩並非專業攝影師，所用的只是一般「儍瓜機」，她更抗拒用數碼相機，她說：「影相係靠自己感覺，構圖同光線，雖然我影相好隨意，但用菲林影相感覺靚好多。」
一個人流浪，小倩自有一套保安守則，她說：「夜晚就唔好出街啦！守住呢個原則就冇問題，隨身有一把刀仔，同好靚嘅哨子，不過好彩冇用過，試過有次遇到個吉卜賽女人帶住個細路，想打劫我，畀我打走咗。又有次喺希臘坐巴士去一處好僻嘅小鎮，其他人落晒車，個司機話要請我飲咖啡，當時得我一個真係有啲擔心，不過如果司機係靚仔就唔驚。」
不過小倩即使遇上英俊男士邀約，仍不為所動，她說：「有異性對你有好感，最好避忌吓，尤其一個女仔去旅行，唔好以為自己有幾靚，人哋幾有誠意，都要友善咁去拒絕，你要諗人點解要請你，通常都有目的。」
令小倩最難忘的，相信是在毫無準備下登上有四千幾呎高位於沙巴的神山，小倩自豪地說：「只得一個背囊，加一個導遊，用咗兩日時間爬上山，得到一張證書。」
