中原早前發表統計數據顯示，上月十大二手私人藍籌屋苑買賣合約登記，跟隨大市向下，只得六一九宗，比三月減少一成七。除咗沙田第一城及觀塘麗港城，錄得五點五與二點二個巴仙增幅，其餘減少四個巴仙至近三成半，都咪話唔厲害。
不過，近月熱賣嘅樓盤，尖沙嘴擎天半島，及薄扶林貝沙灣，市況好突出，擎天上個月共有九十四宗二手登記，比三月多一成三，總值增近兩成七。宗數可以拍得住一向登記量排一二位嘅二手屋苑，真係唔講唔知。
至於貝沙灣，二手登記雖然只得五十六宗，但比三月多六成半，總值重誇張，勁增七成八，達到五億九。豪宅市況勝中小型住宅，難怪唔少市場人士都話豪宅炒風勁啦！
地產代理高層，時時都要向下屬「捽數」，同老細交代，估唔到𠵱家連搞善慈活動，都有可能要咁做。香港置業搞嘅美善會，屬於集團義工隊，公餘時間做善慈活動，回饋社會。
美善會最近委任三個正副會長，做美善大使，分別係港九新界三區區域營業董事，即係翁祥生、姚偉南與王品弟，佢哋除咗自己畀錢，贊助善慈活動，重身負任務，推動前線員工，積極參與善慈活動。
蘭西幾時都支持推廣善慈活動，但係希望參與者係發自真心，唔係就大家都唔開心。
政府為咗鼓勵私人發展商善用工廈，將工業區陸續改劃為商貿地帶，容許作商業用途。其中臨海觀塘及九龍灣，發展商更改用途，態度最為積極。
但係，舊年完成嘅「香港城市設計指引」，強調要保護維港兩岸山脊線。唔知係咪擔心會同區內發展唔相符，所以規劃署諮詢公眾，為期兩個月，睇吓市民對兩區嘅建築物高度有乜建議，先至將適當高度限制，納入法定大綱圖內。咁做可以減少受批評，避免引起爭拗。
規劃署話，目標係喺高度限制之餘，都要兼顧區內特色與整體景觀和諧。更新大綱圖，可以控制兩區嘅蛻變。
自從政府停賣居屋，銀行少咗瓣樓按業務，為咗爭取多啲生意，轉按係其中一個途徑，即係撬同行嘅客。
蘭西聽講，最近有居屋住客，收到銀行傳單，話可以提供轉按服務，息率可以低至優惠利率減二點六五厘，同私樓睇齊，重有現金回贈㖭。
今時今日，銀行嘅服務，唔會咁就算數，會聯同律師行，提供「一站式」服務，包括向房委會辦理申請轉按手續，手續費與估價費梗係全免啦！
鴨脷洲深灣軒會所有個靚泳池，重望到避風塘與海洋公園，發展商新地物盡其用，跟香港潛水訓練學院合作，舉辦「深灣專業兒童潛水訓練」，8至15歲可以參加，遲啲喺深灣軒泳池學浮潛，另外會有理論課程。
噚日記者會，請嚟一班小嘉賓，着晒泳裝與潛水裝出現，好有夏日色彩。
除咗玩潛水，發展商重覺得，細路仔應該注重健康同埋做運動，呢個周末開始，會喺池畔舉行「深灣細運會」嘅兒童運動會。喺15與16號兩日，會邀請香港業餘游泳總會香港韻律泳代表隊成員，即席表演韻律泳，細路仔有得玩之餘，大人都可以欣賞吓表演。
蘭西
電郵地址：
