九月立法會選舉期近，各路人馬都摩拳擦掌，吼實立法會個位。其中代表證券經紀嘅金融服務界，聽講話有四個人想爭，包括現任議員胡經昌，前任議員詹培忠同馮志堅，以及已經加入自由黨、人稱「KB馮」嘅馮家彬。
四人競爭嘅箇中關係微妙，因為胡少雖然係現任議員，但有經紀認為佢未為業界盡力，馮志堅係銀行出身，經紀對銀行爭食已好不滿，所以對佢參選不利；KB係新人，而且一向予人好好先生形象，但佢究竟會點處事係未知之數。
至於阿詹，佢敢言又風趣，理應係選民心水，之但係佢同政府有過節，有經紀擔心，如果選佢出嚟可能影響同政府關係。不過，若果四人出選，仍以阿詹機會較高。
路邊消息話，有人已開始做嘢，正考慮勸退胡少同馮志堅，減少分薄票源，另外又以選出有案底之人可能影響業界形象為由，明顯沖着阿詹，希望集中選票等KB勝出。呢鋪都幾刺激，據悉，阿詹今次選輸，將放棄以香港作長居之地，唔再留戀。
（圖）有意爭取金融服務界席位嘅詹培忠，九月選舉對手可能由三個變一個。
資料圖片
傳真︰2623-9278
電郵︰