唔少日本水着女星都走純情路線，繼小倉優子之後，俾行內大爆扮純情嘅重有仲根霞。原來霞女自入行以嚟一直「戀」事多為，最近棒球手阿部慎之助狂追霞女，點知，霞女被踢爆搭上咗年屆四十嘅著名寫真集攝影師根本好伸，聽聞霞女同根本叔涉及援交關係㖭！
據今個星期出版嘅日本報章《NaitaiSports》報道，自從仲根霞前年喺札幌主持過開球禮之後，巨人棒球隊嘅隊員阿部慎之助就對霞女一見鍾情，重主動追求，不過霞女直至𠵱家依然當阿部透明。
有行內人大爆仲根霞根本唔係好似喺鏡頭前咁純情，佢入行之後曾先後搭上過騎師福永祐一、有名格鬥家同男性雜誌編輯，佢最近重同出名幫過好多女星拍寫真集嘅攝影師根本好伸行埋㖭。
爆料者話：「根本好伸雖然成四十歲，但佢一頭好鬼yeah嘅金髮再加上平事揸保時捷出入，吸引到唔少妹妹仔，仲根霞當然係其中之一啦。」消息重話根本叔一直有畀錢霞女使，所以好多人質疑佢哋係真戀愛定係援交。我羅拉真係想阿部慎之助快啲清醒，唔好再嘥埋啲時間同精神喺啲咁嘅女人度，專心打波好過啦。