我求大俠睇完收費台禮拜日嘅播波秩序表後，對佢哋選擇直播意甲安玻里主場對國際米蘭，而AC米蘭對布雷西亞只能錄播呢個安排有少少意見。假如你問我，我就想睇巴治奧告別戰直播嘞。
我知有關方面係考慮安玻里要搶分護級，而國米要保住四哥位置，競賽意味較濃；但話晒係「神奇小馬尾」告別賽，相信較多球迷寧願喺當晚九點鐘坐定定，第一時間見證球王喺米蘭聖西路球場告別嘅場面，梗係比夜麻麻捱眼瞓睇番錄播好得多。
當然，怕且國米球迷又可能會持相反意見。公說公有理，婆說婆有理，無話邊個實啱。假如你有權話事，你想有咩安排？
紐卡素作客和咗修咸頓，無咗參加下屆歐冠盃資格，當活基治受傷同奧拜恩停賽，由今季經常錯漏百出嘅巴布爾擔正，都諗到遲早出事；果然呢位「肥仔」前晚「擺烏龍」，累到球隊最後將聯賽第四送畀利物浦。領隊卜比笠臣其實畀好多機會，可惜佢又當罪人，下屆怕且係咁先！
意大利聯賽會同埋SkyTV近日密密斟，據聞由來季開始，部份意甲會喺當地禮拜日午飯時間踢「早場」，即係香港時間夜晚七點（夏令）、八點（冬令）。呢個安排固然為疏導球賽（來季共二十隊波），更重要係攻東南亞睇波市場，意大利波喺呢方面落後人哋咁多年，總算跨出一大步。
啱啱講完意甲賽序變招，轉頭又聽到意大利國家隊落實喺今年十一月十七日到北京同中國國家隊友賽。喺呢段頻密賽序時候整場咁嘢，你話唔係錢作怪都無人信。意大利足總方面重講到明透過國家隊此行，推廣一吓意大利嘅品牌。家陣至進軍大陸市場，遲到好過無到啦。
ESPN原本話直播維拉對曼聯，但後來決定改播阿仙奴對李斯特城。維拉場波係有競賽意義，佢哋如能贏波，就出線下屆歐協盃。雖則阿仙奴已成英超冠軍，但只要唔輸，可創下英超全季不敗紀錄，兼且喺賽後捧盃；有咁多賣點，ESPN轉軚無可厚非。