恒指跌131點，收11396，期指高水3點。月底前滙恒除息，會拖低恒指46點，所以期指實際係高水49點，個市未必再踩多一腳落去。不過，期指高水低水代表大市去向嘅準確性，唔係好可靠，好多時啱啱相反。𠵱家港股始終要睇美股點走，而美股嘅變化又真係非常難以捉摸。
近排美元意氣風發，啲滙價較大波動。
美元兌日圓Call輪9277再升26%，收20仙，由3月底至今，升幅係586%，犀飛利。美元升，9277就升，移動方向就係咁，揸隻輪等於揸美金short日本紙。隻輪下月底到期，溢價0.9%，槓桿率39倍，單純睇數據，值博率好高。但要同時考慮嘅，係美元兌日圓由3月底至今（只係個半月時間），由104.4升上113/114，係唔係上邊重有水位呢？
9277同類輪係9852（美元兌日圓升，9852亦升），壽命長過9277好多，11月到期，輪價47仙，溢價1.7%，槓桿率16.6倍。
若然睇美元兌日圓會回落，則只有美元兌日圓Put輪9856一隻可以揀。隻輪11月到期，輪價7.7仙，溢價11.7%，槓桿率101.3倍。不過淨係睇溢價，都幾蝦人買。炒滙價輪，弊處係大多數人都冇法子即刻知道溢價係幾多。有高檔報價機嘅專業炒家，即時睇住滙價變化，又即時睇到溢價等數據，着數好多。散戶贏錢，可能靠運氣多過靠眼光。
章盛