港股噚日雖然繼續下跌，但市場活動已唔再係側埋一邊，對好友而言，總算有點安慰，亦見到曙光。
睇盤路，基金已開始入番市，佢哋喺高位一路掟貨，𠵱家喺低位買番，呢個波幅玩得挺「漂亮」。噚日基金開始買番國企，中鋁（2600）、鞍鋼（347）、重鋼（1053）同江銅（358），都係主力對象，其中尤以重鋼買得最急，摩根大通下晝開始出動，在2.6元係咁接，短短一個鐘頭內，起碼接咗8至9球，幾乎係總成交（14.5球）嘅6成。基金大手入市，唔代表股價唔會跌，好似上述4隻國企，噚日都係下跌收場，但起碼知道基金嘅動向，在日後升浪再現時，對選股有幫助。
噚日大市再試低位支持，曾經跌到落11354，好在重守得住大前日嘅低位11331，收市11396，跌131點，成交縮到只得113億元。不過，期指尾段個勢好強，掃到上11399收市，微跌13點，由低水變番高水3點。其實，計番大藍籌除息嘅因素，期指已高水幾十點，唔排除有淡倉積極回補。大市發展到現階段，已開始有對手，再沽落去亦唔係咁易，若未來幾日都見有大盤係咁收貨，則大市就有好大機會到底。
冠捷科技（903）係近日表現較強勢的股票，由低位4.15元反彈上4.9元水平，噚日收4.85元，跌5仙，走勢似形成旗形，若破位而上，有機會重遊4月中的5.85元高位。
冠捷03年度（12月年結）業績表現比市場預期為佳，營業額21.3億美元（下同），升41.7%，獲利6958萬元，升35.6%，每股盈利5.17仙，全年派息1.43仙，派息率由21%提升到28%。
LCD需求殷切，去年產量450萬台，升125%，但價格下跌，營業額只增99%，維持全球第2大。CRT銷售1030萬台，升13%，營業額只升1%。LCD毛利率比CRT低，去年佔公司收入比重由02年的41%升至58%，毛利率則由7.9%下降至7.4%。
個人電腦顯示器市場需求殷切，公司已預期04年營業額可上升至28億元，估計獲利8300萬元，每股盈利6.1仙（折47.5港仙），保守12倍PE計，股價已可見5.7港元。
郭兆誠