香港果然遍地係黃金，呢幾日旺角地底再次發現寶物，包括唐代灰窰、晉代陶罐，同埋一隻漢代嘅陶釜（即係用嚟煮餸用嘅鑊咁解）！雙失青年，若然冇工開，得閒不妨攞把鏟掘吓地，話唔定好過中六合彩！
原來喺千幾二千年之前，油尖旺一帶，經已有大量居民喺度洗衫煮飯，並遺留一大堆罎罐沙煲。次次都係起樓打樁嗰陣時俾地盤工人發現，可見二十年來，啲打樁機同泥頭車，都唔知搗碎幾多文物，或者俾政府掟晒落堆填區！
呢啲就係盲目發展地產嘅結果。地產商無良，為求暴利，不惜摧殘我國珍貴文物，今時今日又黑起塊面教訓香港人「愛國」，其實佢哋先至對唔住中華文化。
不過，喺地底掘到嘢，通常都唔係咁簡單，其中有天意。好似嗰套驚慄名片《驅魔人》，一開頭就係一個美國考古學家喺伊拉克掘出一個魔鬼嘅石像，將撒旦嘅妖靈，釋放咗出嚟，附咗喺一個美國家庭嘅細路女身上！
喺我國，在地底掘到啲千年文物，通常都有某種天機。呢，前幾年朱鎔基啱啱上台做總理嗰陣，咪話有人喺湖南唔知邊一忽土地，掘到一塊碑，上面刻住個「朱」字嘅？水滸傳一開頭，都係話喺地底掘到一塊大石，上面刻住七十二地煞、三十六天罡嘅妖魔圖，塊妖石一出土，當堂梁山泊嘅一百零八條山賊就顛覆作亂！
所以今次喺九龍鬧市，無喇喇掘到咁多千年騎呢古物，喺呢個冇晒方向感嘅亂世，一定有某種預警。例如，下一屆特首將會係邊個？話唔定過兩日，喺西九龍嗰個方向，掘開條路，整整吓，又會發現有一嚿睇落好似係煲呔形狀嘅大麻石，經港大考古學用碳同位數方式考證，發覺呢嚿煲呔化石，係屬於六千年前嘅黃帝時代，原來嗰陣時嘅先民，有一種咁嘅服飾呢？
又或者，下個禮拜喺灣仔大佛口出土，有一塊碑，上面用篆書刻住個「英」字，上交北京大學一批專家考證，有人話屬於南朝「梁」武帝時期，不過又有人話係屬於「唐」代，兩派各執一詞，互不相讓，結果