溫總發出連串好消息，話宏調已見成效，暫無加息壓力，又話預咗一筆錢買官債支持香港，搞到唔少散戶入市博反彈，港股噚日最高升至11662，大升154點，但大戶趁高減磅，資金愈走愈多，恒指升幅收窄至20點，收報11528，成交146.4億元。
博反彈者噚日再一次受到教訓，幸而港股午後由高位回落的幅度唔算太大，但並非日日咁好彩。現時是資金流向主宰大市，在資金流出的情況下，芬佬沽貨可以唔問價，就算溫總用晒買官債嘅錢來支持港股，都未必可以頂得住。
聯通（762）有意進軍香港流動電話市場，打算在本地搵合作夥伴。消息刺激本地電訊股，細細粒容易炒，兼且可能是收購對象的SUNDAY（866）勁升13%至0.48元；而成為聯通合作夥伴大熱的電盈（008）亦升3.5%至5.15元。如果聯通與電盈聯手收購SUNDAY進軍本港市場，其實對數碼通（315）最為不利，但數碼通一樣升逾3%，收8.40元。
東方燃氣（2915）跌吓深啲又深啲，噚日再跌7.5%至2.175元，愈來愈接近小小超的入股價1.80元。東燃現時公眾持股量僅為20%，需在6月10日前增加至25%，以符合上市規則。據聞電盈已決定沽5%東燃舊股套現，配股價希望不低於1.80元。若以此計算，涉資約1.59億元，雖然唔算一個大數目，但先前以2.65元的接貨者，現價帳面已蝕18%，試問重有邊個敢跟小小超玩。
建滔（148）被納入大摩指數，股價急升8.8%至13.60元，成交達5061萬，但有26%屬沽空交易，後市未必太樂觀。
阿虎