一向予人金融警察形象嘅證監會，噚日出版嘅最新一期年報，有其輕鬆一面。原來證監舊年組織咗一隊籃球隊，同其他財經監管機構合辦一個監管機構杯，最後佢哋打低任總嘅金管局、港交所同積金局，捧走獎盃，都咪話唔犀利。
除咗籃球，證監又組織咗羽毛球、足球同乒乓球隊，但就唔知有冇籃球隊咁厲害。年報又特別提到，證監行政科高級經理張伯陶舊年獲特區頒發銅紫荊星章，表揚佢喺民安隊嘅表現，可見證監唔係咁木獨嘅機構。
睇開年報，當然唔少得睇佢哋高層嘅人工，主席沈聯濤上年度薪酬總額六百八十萬元，同前年一樣，其中六百七十五萬元係固定薪酬，其餘係按表現掛鈎嘅浮動薪酬同埋退休福利。
傳真︰2623-9278
電郵︰