大市噚日先升後回軟，反映大市可能未跌夠，但偏偏有幾隻股份停牌搞配股，或者配售可換股票據，重話隻隻都有人要晒，小初不禁要講個服字。
噚日停牌配股，包括日前先至提過嘅先科國際（724，前稱千禧智慧），估唔到隻股一改名，就即刻停牌配股，據講今次先科按每股1.13元配股，集資約2000萬元。
經紀陳話，雖然配股價較停牌前收市價1.19元，僅折讓5%左右，但集資銀碼咁細，任何一位有實力嘅炒家都坐得起，而江湖傳聞，今次係某位大隻佬接貨。
至於另一隻搞配股係亨泰消費品（197），據講按每股1元，配售最多1.44億股，集資金額億多元，據講一樣有人接晒。早前亨泰買大慶石化（362），一度引起芬佬疑慮沽貨，但好快已經有另一個芬佬接力。今次又搞批股，莫非又有新嘅芬佬參與？
小初其實唔多明白，點解有人在淡市中搞咁大動作，照計炒高都好難搵人跟。
慕容小初