噚日係一年一度嘅國際護士節，為表揚一班面對沙士病人都絕不畏縮嘅白衣天使，立法會衞生服務界議員麥國風特登整咗二萬幾個印上「護理專業、惠澤社群」嘅襟章，送畀全港護士，連醫管局高層高永文等都有份。
麥議員噚日一早就去各大醫院送禮，去到瑪麗醫院，順道去探早前掀起社會各界討論安樂死問題嘅癱瘓病人阿斌。麥國風話，阿斌頭、頸都可以郁動，講嘢雖然用唇語，但都可以透過臉部表情輔助。
得到一班醫護人員悉心照顧，麥國風好高興咁話，阿斌𠵱家經已唔再抑鬱，當麥國風向阿斌講述自己反對安樂死嘅觀點時，阿斌雖然冇畀回應，但都好留心咁去聽。阿董都撐到咁耐，八方都好希望阿斌能鼓起勇氣，積極面對人生，堅持下去咁照顧佢嘅醫護人員就可謂收到最大份嘅護士節禮物。
（圖）醫管局高級行政經理（護理）林崇緩（左）為高永文（中）戴上由麥國風（右）送出嘅襟章。
傳真︰2623-9278
電郵︰