恒指曾升過154點，埋單則只有20點進帳，個市都重係有壓力。國企指數醒目少少，升幅1.5%，比恒指升幅0.2%大啲。睇嚟國企股開始見底，可以細細注玩吓中企指數Call輪。
中企指數Call輪，溢價普遍都好高，只適宜短炒，對象有9984同9363。9984喺11月到期，輪價18仙，溢價9%，槓桿率5.2倍，9363下月到期，輪價12.7仙，溢價7.2%，槓桿率13.7倍，呢一件風險大過9984好多。
滙控（005）高低波幅1.50元，最低111元，收111.50元，微跌0.50元，估計可守110元大關。有機會觸及110元嘅話，吼機會揸些少Call輪，炒上落。對象係9974、9808。9974喺10月夠鐘，輪價56仙，溢價4.6%，槓桿率19.9倍。9808亦喺10月到期，輪價45.5仙，溢價4.5%，槓桿率24.5倍。想刺激一啲，則揀9135，下月底到期，輪價34仙，溢價1.7%，槓桿率32.8倍。滙控下周三除息1.01元，隻輪實際溢價係2.6%，炒9135要計埋除息因素。
新地（016）早段見64元後回頭，收62.25元，由升變跌，微退50仙。地產股跌咗唔少，新地係地產股王，有機會跌後反彈，Call輪可以吼低買些少，但記住真係只適宜短炒，因為溢價太高，萬一睇錯市，輸埋溢價會非常傷，對象為9858，明年1月到期，輪價51仙，溢價17.9%，槓桿率12.2倍。
章盛