萬花筒寫真正邪合一
小倉優子賣唱賣肉瓣瓣掂

唔知大家記唔記得我羅拉講過，無論係肉彈型或者鄰家女孩型嘅水着女星，出碟做歌星都冇好結果，好似以根本春美為首嘅R.C.T.出咗幾隻碟，喺流行榜一個位置都冇，蝕大本之後，惟有食番老本再出寫真。

破若槻紀錄
但唔講你唔知，原來𠵱家行內撈得最掂嘅，係「妹系始祖」小倉優子。佢之前扮西洋公主出嘅處女細碟，話晒入咗Oricon榜二十七位，取代咗若槻千夏之前排第二十八嘅紀錄，而且留喺一百位四個禮拜咁耐㖭，小倉今次乘勝追擊再扮東洋公主，推出新細碟《永遠之lovely》，聽個名就好似少女松田聖子嘅懷舊金曲咁，佢重打正「21世紀純正偶像」嘅旗號，好似好有信心實賣得咁。
而為咗造勢，小倉最近又出咗本新寫真集《IDOL萬花筒seriesvol.1「小倉優子」》，sell嘅都係佢無邪又性感嘅形象。喺本書入面，小倉都係企喺布滿鏡嘅房間擺甫士影相，由於萬花筒嘅布置新鮮，效果又有趣，聽講喺同期寫真集中去貨最快㖭。