E32004絕對係呢幾年最有睇頭嘅一年，事關三大廠商都會同時發表新嘅手提機大計，未睇任天堂NDS、Nokia第二代N-GAGE前，先有SCE喺開Show前一日嘅記者會，正式發布最為機迷期待嘅手提機PSP，為E32004率先揭開手提機戰幔。
記者、攝影：許福合
喺發布會之前，市場傳聞PSP極有機會首度亮相，故此全球傳媒都爭相報名，可惜名額實在有限，而《蘋果日報》有幸成為全港唯一一份報紙參與，為大家落實報道PSP嘅真正規格。會場內出動超過18個屏幕向中外傳媒介紹來年大計，除PSP外，亦有唔少勁Game介紹。
當SCEACEOKazHirai一拎部PSP出場時，全球行家即時舉機狂影。呢部黑色小霸王，雖沿用早前概念機嘅黑色主調，不過機身設計改動不少，首先係四邊角唔再係渾圓，而係四邊都凹咗入去，上邊左右角相信係L、R掣，而左下角則為頸繩扣，右下角就乜都冇。按掣排列未有大變動，不過就稍為凸出，而最搶眼係個4.3吋TFT大芒，以16:9闊屏幕式設計，而顏色顯示達6萬5色（16bitColor）。記者會上更即場播放一段PSP版嘅《FF7》片段，畫面靚到重以為介紹緊PS2新Game㖭，聲畫效果絕對令人期待。
從規格睇嚟，PSP絕對唔係普通遊戲機，內置802.11b無線網絡功能，玩法當然大大加強，如網上遊戲、多部PSP連線對戰、甚至可以下載遊戲及軟件等，不過呢啲都只係基本，重頭戲係配合容量高達1.8GB嘅UMD（UniversalMediaDisc），作電影及MTV等影音檔案下載，做埋流動影院，大有成為手提數碼娛樂中心嘅潛力。PSP預計年底喺日本發售，香港推出時間未定。
最後順帶一提，SCEH喺會場亦同時宣布，為慶祝PS2喺香港發售超過100萬部，主機會進一步調低至$1,180，實在相當吸引。
