老董俾袋住本美國護照嘅恒隆主席陳啟宗，狂窒係「揦屎上身」嘅「三零特首」。八方噚日見到董太，董太話佢冇睇報紙，重反問八方「乜嘢係三零特首」，經八方解釋，「即係三項能力食蛋」；董太就咁回應：「佢講笑啫！」
婦女團體崇德會噚日喺交易廣場美國會舉行午餐會，立法會主席范徐麗泰致辭時大談「廿一世紀女性的挑戰」，但身為崇德社贊助人嘅董太，竟然向職業女性大談「隔夜麵包」。
董太一開腔就話：「我𠵱家話畀你聽，尤其係上班一族，董太講嘅嘢最實惠，對你有益，OK？」隨後教大家點樣將擺咗三、四日嘅麵包，用水浸一浸，再用保鮮紙包住，然後搵條濕毛巾包多一層，擺入微波爐叮十秒，包保「又軟熟又好食」，更叫大家「唔好睇小佢，對上班一族好重要！」
會後有崇德會成員同八方講：「你第一次聽唔慣唔出奇，好多人可能會好似你咁打個突！董太今次教『整餅』，佢以前重試過教『扮靚』！我都想叫董太唔好喺呢啲場合講呢啲嘢，不過真係唔好意思當住佢面講。」
咦，老董係咪食得太多董太嘅撚手軟熟隔夜麵包呢呵？
（圖）無論台上台下，董太講嘢最實惠，你哋一定要聽，OK？
黃賢創攝
傳真︰2623-9278
電郵︰