下季開鑼前征戰頻仍<br>求驗客手記:紅魔唔驚有頭冇尾?

下季開鑼前征戰頻仍
求驗客手記:紅魔唔驚有頭冇尾?

曼聯就公布咗喺下個球季前,主辦一項四角熱身賽,對手會有燕豪芬、浦和紅鑽同小保加,連同美國之旅、歐冠盃外圍賽,真係踢到班球員腳軟。
爭唔到聯賽亞軍,紅魔下季肯定要踢歐冠盃外圍賽,連同今年初決賽會再到美國進行表演賽,同埋有機會以足總盃冠軍身份踢慈善盾,基本上下季前的賽期都幾密,𠵱家又決定經電訊贊助商,籌辦四角賽,到球季正式開鑼前,經已要踢八場比賽;對於一班要踢歐洲國家盃決賽周球員就更加慘,唔好彩打入決賽踢到七月四日,就只得三個星期時間休息。
紅魔今季踢得咁差,下季肯定要大翻身,但係季初谷咁盡,我求大俠質疑真係唔驚季中開始大跌watt?

決賽前禁球員睇搞事戲韋斯成熟識大體
米禾爾領隊韋斯話明如旗下球員去睇一齣關於球迷搞事嘅戲,唔使旨意踢下周六對曼聯場足總盃決賽。韋斯話佢哋喺嗰日會行紅地氈入場,若有睇過嗰套戲,就會帶個錯誤訊息畀在場同電視機旁球迷。記得韋斯以前係麻煩友,試過打對手同隊友,𠵱家佢識得咁諗,證明佢成熟晒。

執法兵工廠收鑼戰最後判官望留好回憶
阿仙奴能否以完美不敗姿態,完成今季英超聯,今個星期六對李斯特城時就會揭盅,對負責執法此場賽事球證老牌杜堅嚟講,亦別具意義,球證生涯最後一次執法,亦剛剛係第一千五百場執法賽事,睇下杜堅到時會唔會遷就「兵工廠」,締造佳績之餘,又幫自己留下美好回憶?

球員爭射12碼真失禮聖日耳門要反省
前日巴黎聖日耳門吞波爾多三蛋,查實聖日耳門響比賽中並非全無機會,先有迪曉上半場射失十二碼;到下半場再獲十二碼時,連拿度就同盧保查爭踢,結果前者爭贏但又射失,事後盧保查重怒目相向㖭。
輸波已經唔好,再搞埋啲咁嘢,點爭標呀?

作歌唱好維拉得獎宿敵伯明翰躉係得嘅
英國早排有個球會打氣歌創作比賽,結果由叫靴斯嘅伯明翰球迷贏咗。但搞笑嘅係佢隻歌嘅內容唔係關於伯明翰,係伯軍嘅宿敵維拉,重係歌頌安祖㖭;唔怪得連佢都話,如佢作唔到隻好歌畀伯明翰,睇怕死梗。靴斯咁有創意,睇怕英格蘭領隊艾歷臣要搵佢作隻歌激勵吓士氣。