嘉華地產西灣河鯉景灣商場，即蘇豪東，近年搞得有聲有色，不過，助理總經理陳玉成話，佢哋會重整租戶組合，集中提升太安街與鯉景道D區舖。因為隔籬官地會做高爾夫球練習場，呢類高檔活動，會吸引高消費力嘅市民。
佢哋諗住出年檢討D區百佳超市，及哈迪斯快餐兩個舖位，有意租畀售賣高球用品店，同埋高檔特色食肆。轉數果然夠快。
陳玉成話，蘇豪東租金收入，第二季比舊年第四季增加四成。舖位實用面積呎租，由四十五至近二百蚊，最貴係代理舖，所以商場剩番嘅一個吉舖，有意租畀代理行，其中怡居王文彥，上個月傾過想租，暫時未有結果。
近排不斷換貨，吸納優質豪宅嘅低調富豪伍集成家族，近日委託仲量聯行，標售山頂加列山道59號屋地，下月中截標。
家族成員代表伍集成女兒伍宗琳，近半年先賣後買中半山雅賓利，先沽出兩個低層，獲利後隨即大手掃入高層，表現勇猛，今次標售山頂屋，唔知係唔係部署入番間更加貴重嘅物業呢？
加列山道59號佔地萬五呎，兩座洋房六五二五呎。若果重建，樓面可增至七千五呎，估計市值億二。
伍氏家族02年以八一五○萬買入，一直作出租用途，回報率只有三厘多，唔算吸引，加上現價較購入價升值近五成，套現再物色更優質物業，似乎重化算。
樓市回落，但係代理開舖，似乎都未有放慢手腳，噚日就有三間代理行開張，美聯重一次過開兩間，喺香港仔金豐大廈開深灣軒專門店，另一間喺深井碧堤半島。
以往代理開舖，都會安排舞獅，今次碧堤半島開幕，就搞搞新意思，玩舞龍，一樣夠晒好意頭。發展商九龍倉重特別送咗隻馬騮擺設，賀美聯開舖，相信佢哋遲啲做碧堤二期都會特別落力。
另外，世紀21噚日喺西灣河鯉景灣開舖，以花爆做開幕儀式，寓意「一飛沖天，大展鴻圖」。世紀21𠵱家已經有八十間分行，一千員工。短期重會開多幾間。
火炭就快又有新盤賣，南豐與永泰合作嘅樂林路項目，命名為晉名峰，噚日隆重其事，搞幻燈片騷，順便透露少少資料，下個月入紙申請預售，最快第三季開賣，明年下半年入得伙。
項目樓面五十萬呎，逾千方呎特色四房戶佔大多數。永泰亞洲企業拓展總監李簡鳳玲話，近排外區新盤特色大碼，呎價統統過萬，晉名峰堪稱區內星級新盤，好有信心四房大戶，亦可躋身呎價萬元樓行列。
南豐發展地產部經理麥一擎都在場，順便問吓，佢哋同長實合作嘅地鐵調景嶺站上蓋項目有名未？佢話未。
蘭西
電郵地址：
