全國政協兼港台赤色名嘴劉迺強近年謾罵民主派愈罵愈癲，儼如鄔維庸接班人，不過佢最近就幾麻煩，事關佢名下一間叫做保康食配嘅公司，捲入勞資糾紛，案件下星期喺勞資審裁處聽候制裁。劉迺強呢間公司被揭發原來冇同員工搞強積金，積金局證實接獲投訴，現正調查事件。
劉迺強猛話只係「普通勞資糾紛」，又聲稱有人公器私用打擊佢「聲譽」，又話公司已立即搵人辦理強積金手續，但工會領袖就話唔搞強積金，僱主有最大責任，職工盟李卓人指劉迺強身為政協，旗下公司卻不依法例辦事，身為老左，剝削員工，有知法犯法之嫌。
劉迺強生意瓣數多多，佢間保康食配公司主要幫一啲社會福利機構嘅飯堂廚房買餸，客戶落柯打就照單採購再送飯菜上門，即是一間流動嘅人民食堂，客戶包括保良局等大機構，行內人估計每月營業額過百萬，利潤隨時高達四、五成，老細淨執都四五十萬，咁又點解唔幫員工搞強積金呢。
傳真︰2623-9278
電郵︰