星期一本欄講「有錢佬唔係大晒」，提及歐洲冠軍球會杯由摩納哥對波圖，證明細球會只要打爭氣波，唔會一定輸畀啲億萬巨星。
原來英雄所見略同，左丁山嘅球評家偶像RobHughes喺星期一「IHT」亦發表一篇「InMunichandMadrid,cashisn'ttheanswer」，講拜仁慕尼黑與皇家馬德里今季三大皆空，有錢買唔到獎牌。《信報》葉孤城專欄喺星期一寫「浮生『弱』夢」，都係講波圖對摩納哥係「弱者的勝利、窮人的勝利、無產階級的勝利」。
賓架D睇完啲文章，對左丁山講：「你哋歡呼窮球會打贏富球會，漏咗一樣好重要嘅先決條件冇講，就係踢足球有一個真正嘅levelplayingfield，無論你係皇馬碧咸、施丹呢類大牌或者係李斯特城嘅費迪南，都有同等機會攞黃牌、紅牌。球證、球例、球場狀況，唔會優惠富翁球星、富豪球會，球場上絕對係優勝劣敗，亦講運氣。但喺商場上，球場唔係一定平坦㗎，個波唔係一定圓㗎，大集團可以有人事優惠，政府偏心，或者甚至中央撐腰，佢哋同你競爭，落場打波，未開波就佔咗七成贏面，問你啲窮公司點同佢打？假如朗拿度撞龍門四次，唔使攞黃牌，摩連迪斯撞龍門一次就攞紅牌嘅話，皇馬係唔係無敵於天下呢？」
賓架D之言，想落有啲道理，我哋歡呼窮人的勝利，可能只會在一個levelplayingfield先至會發生，大闊佬佔盡優勢，球證幫埋佢嘅話，佢真係可以話一句：「唔夠我踢，走開啦！」