恒指升22點，即月期指升175點。前日揸貨嘅，昨日贏少少；前日揸期指嘅，昨日贏多好多。前日期指大低水，原來下文係挾倉。
10大升幅輪升幅由23%至67%，10大跌幅輪跌幅由29%至50%，例牌係啲高溢價、高槓桿率、成交金額唔多嗰批，例外嘅係國壽Call輪9822，收33.5仙，升29%，成交金額26球。
國壽（2628）收4.175元，升4.4%，帶動9822上榜。9822今年9月底夠鐘，溢價15.8%，槓桿率12.5倍。因為有排至夠鐘，短炒唔使太計較溢價，當然如果溢價去到二三十個巴仙，則博唔過。國壽上吓落吓，玩9822，最好喺正股再回到4元邊邊，先至諗上車。
恒指成份股只有6隻跌，個市形勢似乎好番啲。長實（001）與和黃（013）雙雙除息，亦雙雙實際微升。大市有起色，因超賣而再升多些少，長和系有機會追落後，同系輪有兩隻可以吼吓。
長實Call輪9973今年11月到期，輪價32仙，溢價16.3%，槓桿率17.2倍。和黃Call輪9766喺10月到期，輪價26仙，溢價16.1%，槓桿率19.1倍。兩隻輪嘅溢價其實幾高吓，不過短炒唔使過於計較，而且好多隻同類輪，溢價更不切實際。
九倉（004）收21.20元，升30仙，Call輪9178係鎖定回報輪，可以跟吓，現價9.6仙，成交金額12球，明年3月至到期，年期長，短炒唔使太重視啲數據。
章盛