亞視為迎接台慶月，噚日搵咗一班女藝人喺佐敦一酒店泳池賣肉宣傳，最識做當然係亞視台花陳煒，佢以比堅尼示人，十分搶鏡，相反屬勁料之人嘅麥家琪就只係着條吊帶裙上陣，見陳煒咁搶鏡，家琪竟有意無意間稱讚自己嘅身材，佢話：「你哋都知我有幾澎湃㗎啦。」似乎佢想證明有料之人唔一定要靠性感宣傳。
陳煒着條短褲仔，露出咗小腿嘅瘀傷，原來佢連日嚟為咗台慶練習吊環，搞到周身瘀，陳煒話：「醫生話我右邊大腿韌帶撕裂，𠵱家我嘅演出環節會改形式，重要日日敷冰療傷。」
而珈潁噚日喺席上介紹足球節目時話：「鍾意睇波嘅一定開心。」現場嘅人聽後立刻大笑，梗係啦，現場咁波濤洶湧，梗係睇得開心啦。
陳小春日前喺上海開演唱會，入座率不足四成，噚日小春去咗台灣宣傳新碟，就死撐話傳媒特登影冇人坐嘅舞台邊位，後來台灣記者話畀佢聽係影到舞台前排嘅空櫈，佢即刻改口話係因為觀眾未入席啫，馮仁昭請陳小春睇吓啲相先啦，未開騷啲觀眾又點會揮動螢光棒呀？更何況內地其他傳媒一早報道佢個唱唔賣啦，點解佢唔信吓事實！
早前各報館收到多封有關賭王何鴻燊班姨太爭產嘅信，噚日又有新進展，話賭王向四姨太施壓，唔准佢再爭風頭，重話三姨太（箭嘴示）扮好人博賭王歡心。四姨太梁安琪昨晚回應說：「冇辦法啦，叫咗你哋掉佢(指匿名信)，今次唔係攻擊我，但
Cookies成員Theresa最近與Boy'Z嘅Kenny傳緋聞，兩人分別接受電台訪問，Theresa答話睇報紙後冇同對方通電話，但Kenny就話有。事後Theresa好無奈話：「我哋冇夾口供囉！佢係send咗message話唔好意思，喺訪問後我哋先通過電話。我同佢只係朋友，我最唔鍾意做主動追人，以後都要避忌啲！」
周永恆涉嫌藏毒保釋候查後，佢嘅工作全部停頓，其中為無綫拍嘅新劇《學警雄心》亦已辭演。該劇監製黃偉聲話原本打算搵人頂替，但開會後就決定取消佢嘅角色。黃偉聲前日話：「要改動周永恆角色，對成部劇影響唔大，所以決定取消佢原來所演角色，但就加入郭力行同Sky成員潘卓楠。」
梅媽日前接受新城訪問，重提梅艷芳彌留當日，阿梅徒弟在醫院仍然嘻哈大笑，證明陳小春當日曾經鬧過人，佢話：「哼！嗰個陳小春，我多謝佢，係佢有啲良心，鬧嗰班人，成班又講笑、又煲煙，嘻哈大笑，做徒弟都笑得落。」
