大市噚日雖然止跌，但幾乎全世界都認為係技術反彈，所以小初同大部份老友一樣，並冇入市博反彈，怕因小失大，無端被縛就喊都無謂。
經紀陳話近排發覺一隻奇股，就係即將改名做南海石油控股嘅辛康海聯（076），原來呢隻股喺今個跌浪中，不但完全冇受影響，股價更屢創今年新高。
辛康海聯由舊年10月至今，股價一直係咁升，最離奇係4月港股展開大調整之際，正好係辛康海聯股價升得最急之時，辛康海聯噚日又升1.7%，收1.80元，已經係52周高位，雖然成交奀豬，只得80萬股，金額143萬元，但搭棚嘅陣容都算係咁。
辛康海聯早排先至話，旗下在印尼的採油生意，會與合營夥伴在7月續約，跟住重話有意將呢檔生意拎去美國上市。不過，辛康海聯經營呢檔生意多年，但一直都好似唔多賺錢，所以究竟有幾正，其實有待證明。經紀陳話以佢嘅愚見，呢隻股好大機會係私人派對，閒人都係咪不請自來。
慕容小初