尖東深夜，華懋戲院門口，巧遇潮神「鬍鬚弟」，剛睇完《江湖》，佢話：「套戲太過扮嘢，可算眼高手低！我反而期待另一套本地製作《OneNightinMongkok》（即港產片《旺角黑夜》），宣傳口號『7平方公里，28萬人口，30萬非法移民』，好有張力！《精裝追女仔2004》亦好期待，呢啲方為真正潮片。」聽落確實有道理。佢繼續發表他對潮流界的偉論：「上個禮拜，我都有份被邀請去LaserNike個派對，近距離睇真啲雷射關刀鞋，坦白講句，好濕碎！我舅父以前喺家樂商場做雷射木雕，專刻埋啲肉麻字句喺木牌度，當時我已經將對Nike刻咗『緣份』兩個字，計落我算係雷射關刀之曾祖父！講開波鞋，最近『新平衡』喺尖沙嘴開新專門店，標榜賣日版鞋，不過好多波鞋友視察過實況後，話寧願去聯合同利時，佢哋啲日版重多重平。而即將推出嘅黑色香港特別版『新平衡』，圈內人亦唔睇好，原因係個多媒體搞手前科唔好，之前佢搞隻黑猿公仔話限量100，點知正式出貨後有成千隻咁多，搞到班炒家做晒大閘蟹，自此就對佢冇乜信心。所以話做生意個信譽好緊要。」
主持人：大食Jack
八卦熱報：
