喺對皇馬同不來梅揹大鑊而搞到拜仁食白果嘅德國門將簡尼，決定唔做球會隊長；重同佢個廿三歲女友慧雲娜分手，飛咗條女決心戒色，希望藉此重振聲威。
拜仁要搵人頂簡尼都幾𢱑頭。簡尼○二年開始接替艾芬保做隊長，佢出唔到場時，李沙拉素同謝利美斯都戴過隊長章，若然簡尼唔做，佢哋應係合適繼任人。但李沙拉素季尾約滿離隊，謝利美斯係邊緣球員；原本波勒都係考慮之列，但佢俾隊友話冇領導才能，點做隊長呀！
另雖然拜仁喺主場輸咗個德甲聯冠軍畀不來梅，但之後喺不來梅一份報紙登咗半版廣告，祝賀不來梅奪標；拜仁咁有風度，都算抵讚！
now今晚直播意大利盃決賽，但就要提醒球迷，呢場91台嘅直播波既要五十蚊，重要事先打電話去登記，睇怕要好大癮嘅球迷至會用五十蚊睇一場波；逐場收費可能係未來收費電視嘅大勢，衰在五十蚊一場，未免太重手；我求大俠覺得想爭市場，初時應薄利多銷，否則分分鐘得不償失。
阿仙奴中場柏奴亞前年離婚，同意畀前妻嘉倫每年十二萬鎊（一百七十萬港元）贍養費，但嘉倫入稟法庭要求增至每年四十萬鎊，重係終生㖭。法庭重未宣判，但若三十一歲嘅柏奴亞輸就大鑊，雖則佢年薪有一百二十萬鎊，但走緊下坡，遲兩年肯定搵唔到呢個價，佢點畀呀！
洪都拉斯嘅天主教會鬧國家足球隊教練米路天奴域係吸血鬼，事關佢哋有約三百五十萬人每日搵少於一蚊美金，但米路每月搵介乎三萬至七萬五千蚊美金。我求大俠認為佢哋鬧得無理，畢竟呢啲嘢你情我願；更何況洪國足總欠米路成四、五個月糧，米路冇血吸點算吸血鬼呢？
巴塞荷蘭中場戴維斯因唔滿意同隊友進行私人聚會時，俾記者影佢相，於是同對方講手；事後戴維斯除咗俾教練列卡特省到「立立令」，兼由佩奧爾代表佢道歉。我求大俠估唔到戴維斯成三十一歲人重咁好火；佢事業啱啱有起色，如果想繼續留喺西班牙，都係咪搞咁多嘢好咯。