八方去過唔少股東會，除咗舊年股壇長毛DavidWebb到處踩場，搞到啲小股東等極都未散會外，通常都係例牌人民大會堂式嘅「舉手會」，噚日希慎嘅股東周年大會就唔同喇！
一開場，希慎主席利定昌唔係宣布議程，反而係向股東報告吓業務情況，同埋旗下主要收租物業嘅出租情況，又用幻燈片作介紹，十足好似見基金經理咁認真，真係好少見。
講完業務散會嘅時候，希慎為咗慶祝旗下利園二期開幕，重向每位股東送贈港麗酒店出品嘅Tiramisu一個（圖）。希慎企業服務總監容韻儀同八方講，每年股東會都會預備茶點畀股東享用，咁啱上年有沙士，就將點心包裝好派畀小股東，點知大受歡迎，所以今年索性將蛋糕都打包派畀股東，而以後嘅股東會，都好大機會繼續派吓小禮品㖭。
芝士蛋糕雖然只係小小甜頭，不過虧佢咁有心思討好啲股東仔，啲股東點會唔冧吖。
傳真︰2623-9278
電郵︰