小小超李澤楷入主電盈後，有一樣嘢學足佢老竇同富豪世叔伯，就係請前任高官出山喇。佢伯爺以前搵咗前警務處處長李君夏做顧問；細叔伯彤叔又搵過前助理警務處處長程灝明、前區域市政總署署長許雄，同剛退休既警務處處長曾蔭培入去幫手。
小小超前後招攬加盟旗下嘅退任高官，級數重高，而且非常之國際化，包括行政會議前首席議員羅保爵士，之後港英年代嘅前布政司霍德爵士，跟住又有曾做過政務官嘅蘇澤光，噚日八方睇小小超旗下嘅新企業東方燃氣文件，又見到小小超搵咗一位前高官加盟，就係前工務司詹伯樂，出任東燃非執行董事，真係星光熠熠，猛鬼壓陣，身價真係唔同。
講開又講，出任東燃行政總裁嘅李智康，佢一手策劃嘅貝沙灣備受買家追捧熱賣，小小超自然唔會待薄佢。睇番東燃文件，佢舊年就收咗一千零二十萬元酬金，唔怪得佢一日肯捱十五個鐘。
不過公司都重驚佢跳槽，同佢訂立嘅服務合約寫明走嘅話須六個月通知！
傳真︰2623-9278
電郵︰